„ძლიერი საქართველო - ლელოს“ წევრის, ლევან სამუშიას განცხადებით, პროკურატურამ დაუყოვნებლივ უნდა გასცეს პასუხი, დაიწყეს თუ არა გამოძიება პარტია „გახარია საქართველოსთვისა“ და „ქართული ოცნების“ დეპუტატებს შორის პარლამენტში მომხდარ სიტყვიერ და ფიზიკურ დაპირისპირებაზე.

სამუშიას შეფასებით, ადგილი ჰქონდა ჯგუფურ ძალადობას.

„ჩვენ ვიხილეთ ჯგუფური ძალადობა თანამდებობის პირების მხრიდან მეორე სახელმწიფო თანამდებობის პირების მიმართ. აღნიშნულ შემთხვევაში უნდა გაეცეს პასუხი კითხვას - დაიწყო, თუ არა მყისიერად გამოძიება და თუ დაიწყო, რა ეტაპზეა? ამ შემთხვევაში, მყისიერი და ეფექტური გამოძიების რა ნიშნებს ატარებს, თუ დაწყებულია, მაგრამ ჩვენ ვხედავთ, ხშირ შემთხვევაში, როდესაც სხვა საქმეებზე იწყება გამოძიება კომენტარს აკეთებენ, როცა ეს ოპოზიციას და მის მომხრეებს ან სხვა რიგით მოქალაქეებს ეხება. უნდა დაისვას მეორე კითხვა, რომ არ ყოფილიყვნენ ამ ჯგუფურ ძალადობაში მონაწილეები „ქართული ოცნების“ დეპუტატები, რა ქმედება და რეაგირება ექნებოდათ პროკურატურას და სამართალდაცვით ორგანოებს? ასეთ შემთხვევაში, მყისიერად დაიწყებოდა თუ არა განცხადებების გაკეთება და საზოგადოების ინფორმირება? ბუნებრივია, ეს კითხვა არსებობს და უნდა ვნახოთ განსხვავება „ქართული ოცნების“ წარმომადგენლებსა“ და საქართველოს მოქალაქეებს შორის, რომლებსაც თავიანთი ქმედებებიდან გამომდინარე ასხვავებენ“- განაცხადა ლევან სამუშიამ.

26 ივნისს პარლამენტის სხდომათა დარბაზში სიტყვიერი და ფიზიკური დაპირისპირება მოხდა. ერთმანეთს ფიზიკურად დაუპირისპირდნენ „გახარია საქართველოსთვის“ დეპუტატები და „ქართული ოცნების“ წევრები.