ელენე ხოშტარიას ანალიზის სრულ პასუხს არ აძლევდნენ...პენიტენციური სამსახურის უფროსმა თავი დაანებოს ქარაგმულ საუბრებს და პროპაგანდისტულ ხერხებს. მიხედოს საქმეებს, გააკეთოს ის, რაც გასაკეთებელი აქვს. ადამიანი, რომელსაც ჯანმრთელობაზე ზრუნვა ევალება, ცოტა ჰუმანური უნდა იყოს, - ამის შესახებ “პალიტრანიუსის“ გადაცემა „დღის ნიუსრუმში“ სტუმრობისას, „კოალიცია ცვლილებისთვის“ წარმომადგენელმა თეიმურაზ პაპასქირმა, „კოალიცია ცვლილებისთვის“ ერთ-ერთ ლიდერის, მსჯავრდებულ ელენე ხოშტარიას ჯანმრთელობის მდგომარეობაზე საუბრისას განაცხადა.

როგორც პაპასქირმა აღნიშნა, „ქართულ ოცნებას“ ჰუმანურობის პრობლემა აქვს და არაადამიანებად იქცნენ.

„ელენე ხოშტარიას მდგომარეობა არ არის სახარბიელო და ბევრად უფრო მძიმეა, ვიდრე მისი უკანონო პატიმრობის დაწყებამდე იყო. ზუსტი ინფორმაცია, კონკრეტულად დიაგნოზის დადგენის საშუალება ციხის პირობებში შეუძლებელია და საჭიროა მისი გაცილებით უფრო სერიოზული გამოკვლევა ნორმალურ სამედიცინო ცენტრში. მას არაფერს სთავაზობს პენიტენციური სამსახური. პენიტენციური სამსახური იმიტომ არის გაბრაზებული ამ შემთხვევაში, რომ არ ასრულებენ თავის მოვალეობას, ეს მათი ბრიფინგებიდან კარგად ჩანს.

მათ ევალებათ მსჯავრდადებული პირის ჯანმრთელობაზე იზრუნონ და ამას არ აკეთებენ. პენიტენციური სამსახურის უფროსმა იცრუა, როდესაც თქვა, დიაგნოზი სხვა თქვესო. რა დიაგნოზი ჰქონდა ხოშტარიას, როდესაც პატიმრობა იწყებოდა სხვა არის და რაც აქვს ახლა დიაგნოზი, არავინ იცის. ექიმმა გასინჯა წინა კვირას და თქვა, რომ ელენეს ჯანმრთელობის მდგომარეობა მძიმეა.

პენიტენციური სამსახურის უფროსს, ალბათ, იმის თქმა უნდა, რომ ელენე ხოშტარია უარს ამბობდა გამოკვლევასა და მკურნალობაზე. არ ვიცი, რისი თქმა უნდა. ფაქტია, დეკემბრიდან მოყოლებული ელენე ხოშტარიას უმალავდნენ მისი ჯანმრთელობის მდგომარეობის რეალურ სურათს. არ აძლევდნენ რეალურ ინფორმაციას. არც ანალიზების სრულ პასუხს აძლევდნენ...პენიტენციური სამსახურის უფროსმა თავი დაანებოს ქარაგმულ საუბრებს და პროპაგანდისტულ ხერხებს! მიხედოს საქმეებს, გააკეთოს ის, რაც გასაკეთებელი აქვს. ადამიანი, რომელსაც ჯანმრთელობაზე ზრუნვა ევალება, ცოტა ჰუმანური უნდა იყოს. „ქართულ ოცნებას“ ჰუმანურობის პრობლემა აქვს, არაადამიანებად იქცნენ“, - განაცხადა პაპასქირმა.

გარდა აღნიშნული საკითხისა, თეიმურაზ პაპასქირმა 26 ივნისს პარლამენტში დეპუტატებს შორის ფიზიკურ დაპირისპირებაზეც ისაუბრა, რა დროსაც ერთმანეთს ფიზიკურად „გახარია საქართველოსთვის“ დეპუტატები და „ქართული ოცნების“ წევრები დაუპირისპირდნენ.

როგორც პაპასქირმა აღნიშნა, როდესაც 10-20 კაცი მივარდება ერთ ადამიანს და ურტყამს, ამას კაცობასთან და ქართველობასთან კავშირი არ აქვს.

„არ ვთვლი, რომ პარლამენტში ჩხუბი იყო საჭირო და ერთ დეპუტატთან ათეულობით დეპუტატის მიერ მუშტი-კრივით ანგარიშის გასწორება, რათა გვეთქვა, რომ საბოლოოდ გააფორმა „ქართულმა ოცნებამ“ ძალადობრივი რეჟიმი. ეს, 2019 წლიდან მოყოლებული, „ქართული ოცნების“ ხელწერად იქცა. აქ კამერების წინ მოხდა ყველაფერი და რასაც ე.წ. დაკავების მარშუტკებში უკეთებდნენ აქციის მონაწილეებს, ის გაცილებით უარესი იყო. პარლამენტში პირველი და ბოლო ჩხუბი არ არის. საუბარია, თუ როგორ იქცევა „ქართული ოცნება“. როდესაც 10-20 კაცი მივარდება და ერთ ადამიანს ურტყამს, ამას არაფერი აქვს კავშირი კაცობასთან და ქართველობასთან. ამას არაფერი აქვს კავშირი ქრისტიანობასთან, მორალთან“, - განაცხადა პაპასქირმა.

გარდა ამისა, მან საგარეო პოლიტიკაზეც ისაუბრა და საგარეო საქმეთა მინისტრის, მაკა ბოჭორიშვილის განცხადება შეაფასა, რომელმაც აღნიშნა, რომ „საქართველო ერთ-ერთი საუკეთესო მაგალითია, რომ პრაქტიკაში ისაუბრონ მულტივექტორული დიპლომატიის მნიშვნელობაზე, ბრიუსელის მცდელობა კი, იზოლაციის პოლიტიკით გვიპასუხოს, სტრატეგიული შეცდომაა“.

პაპასქირის თქმით, თუ ევროკავშირი შენი მტერია და არ გჭირდება, მაშინ შენი პოლიტიკა არ არის მულტივექტორული.

„ის მულტივექტურული არ არის. მხოლოდ სიტყვით არის. თუ ევროკავშირი შენი მტერია, შენი მოწინააღმდეგეა და არ გჭირდება ევროკავშირი, მაშინ შენი პოლიტიკა არ არის მულტივექტორული. მულტივექტურული პოლიტიკა ნიშნავს, როდესაც ცდილობ შენი საკუთარი ქვეყნის ინტერესების მიღწევას, ყველა მნიშვნელოვან აქტორთან საუბარს და მის შენ მხარეს მომხრობას“, - აღნიშნა პაპასქირმა.