მონაკოში საცხოვრებელ შენობაში ასაფეთქებელი მოწყობილობის აფეთქების შედეგად სამი ადამიანი მძიმედ დაშავდა, თავდამსხმელი საფრანგეთში გაიქცა, - ინფორმაციას Associated Press-ი ავრცელებს.

გამოცემა ფრანგულ და უკრაინულ მედიაზე დაყრდნობით იუწყება, რომ დაშავებულები უკრაინელი მაგნატი ვადიმ ერმოლაევი და მისი ოჯახის წევრები არიან.

მონაკოს ლიდერმა პრინცმა ალბერტ II-მ თავდასხმას „საზიზღარი აქტი“ უწოდა და განაცხადა, რომ უსაფრთხოების უზრუნველსაყოფად ქვეყნის ყველა სამსახური მობილიზებულია.

მონაკოს მთავრობის მაღალჩინოსანმა, სახელმწიფო მინისტრმა კრისტოფ მირმანდმა, ჟურნალისტებს განუცხადა, რომ საფრანგეთისა და მონაკოს ხელისუფლება თავდამსხმელს ეძებს, რომლის მოტივიც გამოძიების პროცესშია.

მისივე განცხადებით, აფეთქება საფრანგეთის საზღვართან ახლოს მდებარე საცხოვრებელი სახლის შესასვლელთან მოხდა, რის შედეგადაც ორი ზრდასრული და ერთი ბავშვი დაშავდა, რომლებიც საფრანგეთის საავადმყოფოებში გადაიყვანეს.

ეჭვმიტანილმა საფრანგეთის საზღვარი ფეხით გადაკვეთა. საფრანგეთის ეროვნული პოლიციის წარმომადგენელმა განაცხადა, რომ ფრანგი სამართალდამცავები ეჭვმიტანილს ეძებენ და მხარს უჭერენ გამოძიებას.

უკრაინული მედიის ინფორმაციით, აფეთქების შედეგად დაშავებული ცნობილი ბიზნესმენი ვადიმ ერმოლაევი და მისი მეუღლე კრიტიკულ მდგომარეობაში არიან.

აღსანიშნავია, რომ 2023 წელს უკრაინამ ერმოლაევს 10 წლით პერსონალური სანქციები დაუწესა. უკრაინის უსაფრთხოების სამსახურის ცნობით, შეზღუდვების საფუძველი იყო მისი ბიზნეს საქმიანობა ოკუპირებულ ყირიმში, სადაც კომპანიები გადასახადებს რუსეთის ფედერაციის ბიუჯეტში იხდიდნენ.