რაც უფრო მეტად დაიშლება აგენტურა, რაც მეტი დაპირისპირება იქნება აგენტურის შიგნით, მით უკეთესი ჩვენი დემოკრატიული სისტემის განვითარებისთვის, - ამის შესახებ საქართველოს პრემიერ-მინისტრმა ირაკლი კობახიძემ ყაზახეთში ქართველ ჟურნალისტებს განუცხადა.

როგორც მთავრობის მეთაურმა აღნიშნა, რეალურად „აგენტურის შიგნით არის კონკურენცია, ისინი ცდილობენ უფრო მეტად მოაწონონ საკუთარი თავი პატრონებს, ეს არის მთავარი მიზეზი, რის გარშემოც წარიმართება ეს დაპირისპირება“.

„ჩვენთვის საინტერესოა ქვეყნის განვითარება, ჩვენ ვართ მთლიანად კონცენტრირებული ამაზე. რაც უფრო მეტად დაიშლება აგენტურა, რაც მეტი დაპირისპირება იქნება აგენტურის შიგნით, მით უკეთესი ჩვენი დემოკრატიული სისტემის განვითარებისთვის“, - განაცხადა ირაკლი კობახიძემ.

გარდა ამისა, კობახიძემ უპასუხა კითხვას სიძულვილის ენის წინააღმდეგ ბრძოლის სამმართველოს მუშაობის ეფექტიანობასთან დაკავშირებით და განაცხადა, რომ „წლების განმავლობაში უცხოური დაფინანსებით თავს გვახვევდნენ სიძულვილსა და აგრესიას და ეს უნდა დასრულდეს“.

„ეს პროცესი არის უკიდურესად მნიშვნელოვანი იმისთვის, რომ ჯანსაღი ურთიერთობები არსებობდეს ჩვენს ქვეყანაში და ჩვენს საზოგადოებაში.

თქვენ იცით, რომ წლების მანძილზე, პირველ რიგში, უცხოური დაფინანსებით თავს გვახვევდნენ სიძულვილსა და აგრესიას და ეს უნდა დასრულდეს. ეს ქართული კულტურისთვის არის მიუღებელი მოვლენა, შესაბამისად, ყველაფერი უნდა გაკეთდეს იმისთვის, რომ ხელოვნურად თავს მოხვეული სიძულვილი და აგრესია ჩვენს ქვეყანაში დასრულდეს.

ამ კუთხით, ამ სამმართველოს და მის მუშაობას განსაკუთრებული მნიშვნელობა ენიჭება და მომავალშიც მის საქმიანობას განსაკუთრებული ყურადღება დაეთმობა“, - განაცხადა ირაკლი კობახიძემ.