სამწუხაროდ, დაპირისპირება საკანონმდებლო ორგანოში ბევრ ქვეყანაში ხდება და გულდასაწყვეტია, რომ ამ ტიპის დაპირისპირება საქართველოშიც მოხდა - მინდა ყველას მოვუწოდო, მაქსიმალურად თავშეკავებულები ვიყოთ! მესმის რთულია, როდესაც სიტყვიერ შეურაცხყოფას გაყენებენ, მაგრამ ამ ყველაფერზე მაღლა უნდა დავდგეთ, - ეს განცხადება მედიასთან თბილისის მერმა კახა კალაძემ გააკეთა.

კალაძის თქმით, ის, რაც პარლამენტში მოხდა, “სასიამოვნო სანახავი ნამდვილად არ იყო“.

„ვფიქრობ, ეს არ არის ის, რასაც საზოგადოება ითხოვს. პოლიტიკოსებს შეიძლება განსხვავებული მოსაზრებები, პრინციპულად განსხვავებული პოლიტიკური შეხედულებები გვქონდეს, თუმცა ეს იმას არ ნიშნავს, რომ ერთმანეთთან ფიზიკურ დაპირისპირებაში გადავიდეთ. ყველამ პატივი უნდა სცეს პარლამენტის ინსტიტუტს. ზოგადად, ურთიერთობები პოლიტიკურ და საქმიან დისკუსიაში უნდა გადავიდეს და არა ფიზიკურ და სიტყვიერი შეურაცხყოფაში, რაც ძალიან ცუდი იყო, რაც ნამდვილად არ არის მისასალმებელი და სასიამოვნო.

რაც შეეხება პასუხისმგებლობის საკითხს, მე არც პროკურორი ვარ და არც გამომძიებელი. შესაბამისად, ამ დეტალებში ვერ შევალ, თუ ვინ დაიწყო ეს ყველაფერი, თუმცა საზოგადოებამ ყველაფერი ნათლად დაინახა, თუ როგორ მოხდა და როგორ დაიწყო ეს ყველაფერი.

ყველას მინდა მივმართო, მესმის, რომ ქართველები ვართ, მესმის, რომ ემოციებია, მაგრამ ძალიან მნიშვნელოვანი თავშეკავებულობა“, - განაცხადა თბილისის მერმა.