ირანის საგარეო საქმეთა სამინისტროს პრესსპიკერის, ესმაილ ბაღაის განცხადებით, ევროკავშირის წევრი ქვეყნების ლიდერებს აიათოლა ალი ხამენეის დაკრძალვაზე დასწრების პატივი არ ექნებათ, - ინფორმაციას Iran International-ი ავრცელებს.

„ევროპული ქვეყნების ლიდერებს არ ექნებათ პატივი, დაესწრონ ირანის უზენაესი ლიდერის, ალი ხამენეის დაკრძალვას, რადგან ისინი ომის დროს ისტორიის სწორ მხარეს არ იდგნენ“, - განაცხადა ირანის საგარეო საქმეთა სამინისტროს პრესსპიკერმა.

შეგახსენებთ, აიათოლა ალი ხამენეის დაკრძალვის ცერემონიალი 4-9 ივლისს გაიმართება. დაგეგმილი გრაფიკის თანახმად, ცხედარს თეირანსა და ყუმში გამართული ცერემონიების შემდეგ ერაყის ოთხ ქალაქში გადაასვენებენ, შემდეგ კი ირანში დააბრუნებენ და მეშჰედში დაკრძალავენ. ოფიციალური გრაფიკის თანახმად, საჯარო გამოსამშვიდობებელი ცერემონიალი 4 ივლისს, დილის 6:00 საათზე, თეირანის იმამ ხომეინის მოსალაში დაიწყება და 5 ივლისის საღამოს 8:00 საათამდე გაგრძელდება. დაკრძალვის ლოცვა 5 ივლისის დილით ჩატარდება. თეირანში, ყუმსა და ერაყში შესაბამისი ცერემონიების ჩატარების შემდეგ, გარდაცვლილ ლიდერს ხუთშაბათს, 9 ივლისს, ქალაქ მეშჰედში დაკრძალავენ.