ოპოზიციური ლანდშაფტი არ არსებობს ქვეყანაში. ამის გაცნობიერება მოგვიწევს, ოპოზიცია წარმოადგენს რეალურად დასუსტებულ აგენტურას, - ამის შესახებ ვიცე-პრემიერმა, სამართალდამცავი ორგანოების კოორდინაციის საკითხებში სახელმწიფო მინისტრმა მამუკა მდინარაძემ განაცხადა.

მისივე თქმით, „ოპოზიცია არის აგენტურა, რომელიც სხვადასხვა ფრთიდან და ფლანგიდან დავალებების შესაბამისად იბრძვის ხელისუფლებაში მოსვლისთვის“.

„ჩვენ მოგვიწევს გაცნობიერება იმის, რომ ოპოზიციური ლანდშაფტი არ არსებობს ქვეყანაში. ამის გაცნობიერება მოგვიწევს. არსებობს აგენტურა, რომელიც სხვადასხვა ფრთიდან და ფლანგიდან დავალებების შესაბამისად იბრძვის ხელისუფლებაში მოსვლისთვის. არსებობს აგენტურა, რომელიც უკვე იყო ხელისუფლებაში და ასრულებდა დავალებებს და ამ დავალებების სავალალო შედეგები ჩვენ ვნახეთ. ბევრმა საკუთარ თავზე გამოვცადეთ, ბევრმა ოჯახის წევრზე, მეზობელზე, ნათესავსა და საკუთარ ქვეყანაზე. მათი ხელისუფლებაში დაბრუნების შედეგი იქნება ისევ აგენტურის მიერ დავალებების შესაბამისად ქვეყნის მართვა. ჩვენ არ უნდა დავუშვათ. ამ არ დაშვების აუცილებელი პირობაა, რომ გავაცნობიეროთ, ჩვენ არ გვყავს ოპოზიცია, გვყავს აგენტურა, რომელიც იღებს დავალებას, აგენტურა, რომელიც შემდეგ აფინანსებს მისი გავლით მედიასაშუალებებს. აგენტურა, რომელთაც ჩაეხსნათ დაფინანსების წყაროები, FARA-ს და „გამჭვირვალობის კანონის“ მიხედვით. ჩვენ კარგად გავთვალეთ ეს სვლები. ოპოზიცია წარმოადგენს რეალურად დასუსტებულ აგენტურას.

მათი ლიდერი იყო მათი მმართველობის დროს სანიმუშო შემსრულებელი დავალებებისა. ამ ქვეყანაში აგენტურული ჯგუფებიდან ერთ-ერთი ყველაზე წარჩინებული იყო მიხეილ სააკაშვილი აგენტურული დავალებების შესრულებაში. ამიტომ მას თავისი როლი რჩება. განსაკუთრებული როლია ის არამხოლოდ მის პარტიაში, არამედ ე.წ.ოპოზიციურ ფლანგზე. ის დღეს ეპრანჭება თავის პატრონებს და ცდილობს მათ დაუმტკიცოს, რომ ისევ გააჩნია გავლენა იმდენი, რომ გააკეთონ მასზე არჩევანი. მისი გამოხტომები მხოლოდ ამას ემსახურება”, - განაცხადა მდინარაძემ.