რაც ფასების შემსწავლელი კომისია შეიქმნა, მას შემდეგ ფასები კიდევ უფრო გაძვირდა - შოუ დაგვიდგეს და უბრალოდ დრო გაგვატარებინეს, - ამის შესახებ „ერთიანი ნაციონალური მოძრაობის“ ერთ-ერთმა ლიდერმა, ვასო ურუშაძემ „პალიტრანიუსის“ გადაცემაში „რეზიუმე“ განაცხადა.

ვასო ურუშაძის თქმით, ფასების ზრდის პრობლემის მოგვარებას სჭირდება კეთილსინდისიერი მთავრობა, რომელიც ორიენტირებულია ხალხზე,

„ფასების კომისია ჰქონდათ, მაგრამ რა შედეგი მივიღეთ? რაც ეს კომისია შეიქმნა, მას შემდეგ ფასები კიდევ უფრო გაძვირდა იმიტომ, რომ ასეთი კომისიებით რეალურად არ ხდება პრობლემის მოგვარება. პრობლემის მოგვარებას სჭირდება კეთილსინდისიერი მთავრობა, რომელიც ორიენტირებულია ხალხზე, ქვეყნის განვითარებაზე და გრძელვადიან გეგმებზე მუშაობს, ცდილობს, რომ გრძელვადიანად გადაჭრას კონკრეტული პრობლემა, ნაცვლად იმისა, რომ უკვე დამდგარ შედეგზე ილაპარაკოს.

ფაქტობრივად, რა გააკეთა ხელისუფლებამ? იმ პრობლემაზე, რომელიც ისედაც აწუხებს ხალხს და ყველასთვის ცნობილია, ამაზე უბრალოდ საჯაროდ იმსჯელეს, თითქოს არ იცოდნენ. დაიბარეს იმპორტიორები, დისტრიბუტორი კომპანიები, მარკეტების ქსელის მეპატრონეები. შოუ დაგვიდგეს და უბრალოდ დრო გაგვატარებინეს. არანაირი კონკრეტიკა, არანაირი მოქმედება და არანაირი რეაგირება ხელისუფლებას არ გაუკეთებია იმისთვის, რომ პრობლემა გრძელვადიანად გადაჭრილიყო“, - განაცხადა ვასო ურუშაძემ.