თბილისის საქალაქო სასამართლოში ჯაშუშობის ბრალდებით დაკავებული, ფინანსთა სამინისტროს საგამოძიებო სამსახურის ერთ-ერთი სამმართველოს უფროსისა და ასევე, „ქართუ ჯგუფის“ საზოგადოებასთან ურთიერთობის ყოფილი ხელმძღვანელის, გიორგი უძილაურის წინასასამართლო პროცესი მიმდინარეობს.

სასამართლო პროცესი დახურულ რეჟიმში მიმდინარეობს.

დღევანდელ პროცესზე ბრალდებულისთვის აღკვეთის ღონისძიება, პატიმრობა გადაისინჯება. ასევე, განიხილება საქმე არსებით განსახილველად გადაეცემა თუ არა სასამართლოს.

პროცესს ესწრება გიორგი უძილაურიც.

ცნობისთვის, გიორგი უძილაური 5 მაისს დააკავეს. მას ბრალდება “სისხლის სამართლის კოდექსის“ 314-ე მუხლის პირველი ნაწილით (ჯაშუშობა) წარედგინა, რაც სასჯელის სახედ და ზომად 12 წლამდე თავისუფლების აღკვეთას ითვალისწინებს.

პროკურატურის მიერ გავრცელებული ინფორმაციით, სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული გამოძიების შედეგად დადგინდა, რომ ერთ-ერთ სახელმწიფო უწყებაში მაღალ თანამდებობაზე დასაქმებული საჯარო მოხელე, გიორგი უძილაური მატერიალური სარგებლის მიღების მიზნით, საქართველოს ინტერესების საზიანოდ, უცხო ქვეყნის დაზვერვის სამსახურის დავალებით, სისტემატურად აგროვებდა და გადასცემდა მათ სხვადასხვა სახის და კატეგორიის ინფორმაციას.