ვაზისუბანში, საცხოვრებელ კორპუსში გაჩენილ ხანძარს შუახნის ქალი ემსხვერპლა. აღნიშნული ინფორმაცია "ინტერპრესნიუსს" საგანგებო სიტუაციების მართვის სამსახურში დაუდასტურეს.

უწყების ინფორმაციით, ცხედარი მაშველებმა ცეცხლის სალიკვიდაციო სამუშაოების დროს იპოვეს. მანამდე მაშველებმა სამი ადამიანი უვნებლად გამოიყვანეს.

როგორც გარდაცვლილი ქალის ოჯახის წევრმა განაცხადა, ხანძარი სამზარეულოში გაჩნდა. მისივე თქმით, ქარის გამო, ფარდა მოხვდა გაზქურას და შემდეგ ცეცხლი ხის მაგიდას წაეკიდა.

"რომ შევედი უკვე ძლიერი ხანძარი იყო. ორნი ვიყავით, ვეძახდი გამოდი - მეთქი, არ გამოვიდა, კარი შიგნიდან მოიხურა, კვამლი არ გამოვიდესო", - განაცხადა ხანძრის დროს გარდაცვლილი ქალის ოჯახის წევრმა "ტვ პირველთან".

ცნობისთვის, ვაზისუბანში ხანძარი დღის მეორე ნახევარში, საცხოვრებელი კორპუსის ბინაში გაჩნდა.