ასეთი ტენდენციური რეზოლუციები მხოლოდ საერთაშორისო ინსტიტუტების სამართლიანობისა და დამოუკიდებლობის პრინციპებს აზიანებს, - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა ეუთო-ს რეზოლუციაზე საუბრისას განაცხადა.

მისივე თქმით, არც ერთ საერთაშორისო ინსტიტუტს არ აქვს უფლება, რომ ქვეყნის სუვერენიტეტში ჩაერიოს.

“კანონშემოქმედება ხალხის მიერ არჩეული წარმომადგენლობითი ორგანოს დანიშნულებაც და ვალდებულებაც არის და არც ერთ საერთაშორისო ინსტიტუტს არ აქვს უფლება, რომ ქვეყნის სუვერენიტეტში ჩაერიოს. მით უმეტეს, როცა ვხედავთ, რომ მსგავსი შინაარსის კანონებს, უფრო მკაცრი რედაქციით, ევროპის სხვადასხვა ქვეყანაში იღებენ. შესაბამისად, ასეთი ტენდენციური რეზოლუციები მხოლოდ საერთაშორისო ინსტიტუტების სამართლიანობისა და დამოუკიდებლობის პრინციპებს აზიანებს. იმედი მაქვს, ეს ბიუროკრატები საბოლოოდ გაანალიზებენ, რომ მსგავსი საქმიანობით ჩვენს ქვეყანაში ვერაფერს შეცვლიან, ხოლო საკუთარ საქმიანობაში მძიმე ეპიზოდებს ჩაიწერენ,” - გამაცხადა იონათამიშვილმა.

ცნობისთვის, ეუთო-ს საპარლამენტო ასამბლეა 8 ივლისს „ჰააგის დეკლარაციას“ მიიღებს, რომელიც საქართველოს შესახებ რეზოლუციას შეიცავს. რეზოლუციის „საქართველოში არჩევნების მთლიანობისა და ფუნდამენტური თავისუფლებების დაცვა“, მთავარი სპონსორი ამერიკელი კონგრესმენი, ჯო უილსონია. ეუთო-ს საპარლამენტო ასამბლეა საქართველოს ხელისუფლებას მოუწოდებს: “გაათავისუფლოს ყველა ქართველი პოლიტიკური პატიმარი, რომლებიც იდენტიფიცირებულია ეროვნული და საერთაშორისო უფლებადამცველთა ჯგუფების მიერ; გააუქმოს ყველა ის კანონმდებლობა, რომელიც ზღუდავს ფუნდამენტურ თავისუფლებებს და ეწინააღმდეგება ადამიანის უფლებების დაცვის შესახებ საქართველოს ვალდებულებებს”.