აშშ-ისა და ისრაელის თავდასხმებმა ომის დასრულების შესახებ ურთიერთგაგების მემორანდუმი არაეფექტური გახადა, - ამის შესახებ განცხადებას ირანის საგარეო საქმეთა სამინისტრო ავრცელებს.

ირანის საგარეო უწყების განცხადებით, აშშ-ის მიერ ირანის წინააღმდეგ განხორციელებული დარტყმების, ირანულ ნავთობზე სანქციების ხელახლა დაწესების, ჰორმუზის სრუტეში ჩარევისა და ისრაელის მიერ ლიბანზე თავდასხმების შედეგად ურთიერთგაგების მემორანდუმი არაეფექტური გახდა.

„ამ დაძაბულობის ესკალაციის სახიფათო შედეგებზე პასუხისმგებლობა ამერიკის მოღალატეობრივ რეჟიმს ეკისრება“, - აცხადებს ირანის საგარეო უწყება.

ასევე, ირანის საგარეო საქმეთა სამინისტრო სპარსეთის ყურის ქვეყნებს მოუწოდებს, რომ აშშ-ს ირანზე თავდასხმებისთვის მათი ტერიტორიების გამოყენების უფლება არ მისცენ.

„ირანის წინააღმდეგ აგრესიის დანაშაულის ჩადენაში ნებისმიერი სახის თანამშრომლობა დანაშაულში მონაწილეობას წარმოადგენს“, - ნათქვამია ირანის საგარეო უწყების განცხადებაში.