აშშ ტერორიზმის სპონსორ ქვეყანათა სიიდან სირიის ამოღების პროცესს იწყებს. ამის შესახებ განცხადებას აშშ-ის სახელმწიფო დეპარტამენტი ავრცელებს.

„დღეს, პრეზიდენტმა ტრამპმა კონგრესს შეატყობინა მისი ადმინისტრაციის განზრახვის შესახებ ამოიღოს სირია ტერორიზმის სპონსორ ქვეყანათა სიიდან, 45-დღიანი წინასწარი შეტყობინების პერიოდის შემდეგ. ეს პრეზიდენტ ტრამპის კიდევ ერთი ისტორიული ნაბიჯია, რათა სირიელ ხალხს სიდიადის შანსი მისცეს.

სირიის წინააღმდეგ სანქციების მოხსნა საერთაშორისო ვაჭრობასა და ინვესტიციებს გახსნის, სირიას აღდგენის შანსს მისცემს, და ახალ ფურცელს გადაშლის სირიელი ხალხისთვის. სტაბილური, ერთიანი სირია, რომელიც მშვიდობაშია საკუთარ თავთან და მეზობლებთან, სარგებლის მომტანია არა მხოლოდ რეგიონისთვის, არამედ მთლიანად მსოფლიოსთვის“, - ნათქვამია განცხადებაში.

განცხადების თანახმად, აღნიშნული გადაწყვეტილება მოჰყვება ტრამპის 2025 წლის ივნისის განკარგულებას სირიის წინააღმდეგ სანქციების გაუქმების თაობაზე, პოზიტიურ ცვლილებებსა და ტერორიზმის საწინააღმდეგო ქმედებებს, რომლებიც სირიამ პრეზიდენტი აჰმედ ალ-შარაას პირობებში განახორციელა, და პრეზიდენტი ალ-შარაას ფორმალურ გარანტიებს, რომ სირია მომავალში მხარს არ დაუჭერს საერთაშორისო ტერორისტულ ქმედებებს.

„დღეს მნიშვნელოვანი ეტაპია აშშ-სირიის აღდგენილ ორმხრივ ურთიერთობებში და სირიის, როგორც ერის ისტორიაში. ჩვენ ვაფასებთ სირიის მთავრობას ახალი კურსის დასახვისთვის და მოუთმენლად ველით სირიასთან და მის ხალხთან ჩვენი პარტნიორობის გაძლიერებას“, - ნათქვამია განცხადებაში.