რუსეთის ვეტერინარული და ფიტოსანიტარიული ზედამხედველობის ფედერალური სამსახური („როსსელხოზნადზორმა“) სომხეთიდან რძის პროდუქტების იმპორტზე შეზღუდვებს დააწესებს, - ინფორმაციას რუსული მედია ავრცელებს.

მათივე ინფორმაციით, ზომები 27 ივლისიდან ამოქმედდება. შეზღუდვები სომხურ საწარმოებს ეხება, რომლებსაც რუსეთში პროდუქციის შეტანის ნებართვა ჰქონდათ.

„როსსელხოზნადზორის“ პრესრელიზში აღნიშნულია, რომ უწყების სპეციალისტებმა 14-21 ივლისს შემოწმება ჩაატარეს სომხეთის რძის გადამამუშავებელ საწარმოებში, რომლებიც პროდუქციის რუსეთში მიწოდებას ახორციელებენ და მრავალი დარღვევა გამოავლინეს.

„როსსელხოზნადზორის“ მტკიცებით, შემოწმების შედეგად დადგინდა, რომ პროდუქციის წარმოებისთვის გამოიყენებოდა დაავადებული პირუტყვისგან მიღებული რძე. ასევე დადასტურდა შემთხვევები, როდესაც რუსეთის ბაზრისთვის განკუთვნილი მაღალცხიმიანი რძის პროდუქტების წარმოებაში გამოიყენებოდა მესამე ქვეყნებიდან შემოტანილი ნედლეული და არა ევრაზიული ეკონომიკური კავშირის (ЕАЭС) წევრი სახელმწიფოებიდან მიღებული ნედლეული.

„გამოვლენილი დარღვევების გათვალისწინებით, „როსსელხოზნადზორმა“ მიიღო ზომები, რათა არ დაუშვას რუსეთში განსაკუთრებით საშიში ინფექციების გავრცელება და ქვეყნის ბაზარზე უსაფრთხოების მოთხოვნებთან შეუსაბამო რძის პროდუქტების რეალიზაცია“, - აღნიშნულია უწყების პრესრელიზში.