აშშ-ის ქალაქ სიეტლში, საკვების ფესტივალზე მომხდარი სროლის შედეგად სამი ადამიანი დაიღუპა, რამდენიმე კი, მათ შორის ერთი ბავშვი, დაშავდა, - ინფორმაციას CNN-ი ავრცელებს.

სახანძრო დეპარტამენტის განცხადებაში ნათქვამია, რომ ორი ადამიანი ადგილზე გარდაცვლილად გამოცხადდა, ოთხი კი, მათ შორის 2 წლის ბავშვი, საავადმყოფოში გადაიყვანეს. მოგვიანებით პოლიციამ განაცხადა, რომ მესამე პირიც გარდაიცვალა.

სიეტლის მერმა კეიტი უილსონმა განაცხადა, რომ პოლიციამ ერთი ეჭვმიტანილი დააკავა.

CNN-ის ინფორმაციით, Gun Violence Archive-ის მონაცემები მიუთითებს, რომ ეს სროლა წელს აშშ-ში მომხდარი სულ მცირე 271 მასობრივი სროლიდან ერთ-ერთია. ორგანიზაცია მასობრივ სროლად ისეთ შემთხვევას მიიჩნევს, რომლის დროსაც ცეცხლსასროლი იარაღით ოთხი ან მეტი ადამიანი დაიჭრება ან დაიღუპება.