Reuters - ირანი შეაჩერებს თავდასხმებს, თუ აშშ-ც იგივეს გააკეთებს
ირანი შეაჩერებს თავდასხმებს მანამ, სანამ შეერთებული შტატებიც იგივეს გააკეთებს, - ამის შესახებ ირანელმა მაღალჩინოსანმა Reuters-ს განუცხადა.
მისი თქმით, თეირანის პოზიცია უცვლელი რჩება : „თავდასხმა თავდასხმისთვის“.
„თუ თავდასხმები შეწყდება, ირანიც შეაჩერებს თავის ოპერაციებს. ეს გზავნილი უკვე გადაეცა შეერთებულ შტატებს“, - აღნიშნა ირანელმა ოფიციალურმა პირმა, რომელმაც გამოცემასთან ანონიმურობის დაცვის პირობით ისაუბრა.
აშშ-ის ელჩმა გაეროში, მაიკლ უოლცმა, გუშინ განაცხადა, რომ აშშ-ის პრეზიდენტმა დონალდ ტრამპმა აშშ-ის სამხედრო იერიშების დროებით შეჩერების გადაწყვეტილება მიიღო, რათა დიპლომატიურ ძალისხმევას მეტი დრო და შესაძლებლობა მისცეს.
„ის მოლაპარაკებებს გარკვეულ სივრცეს აძლევს,“ - განაცხადა უოლცმა, თუმცა სხვა დეტალებზე არ უსაუბრია.
ირანის წინააღმდეგ 13 ღამის განმავლობაში მიმდინარე საჰაერო იერიშების შემდეგ, პარასკევს გვიან ღამით პენტაგონმა სამხედრო ოპერაცია შეაჩერა. შაბათსა და კვირას აშშ-ის მხრიდან ახალი თავდასხმების შესახებ ინფორმაცია არ გავრცელებულა. ირანსაც, რომელიც აშშ-ის იერიშებს მეზობელ ქვეყნებში მდებარე ამერიკულ სამხედრო ბაზებზე დარტყმებით პასუხობდა, ორი დღეა ცეცხლი არ გაუხსნია.
