„თამბაქოს კონტროლის ალიანსი“ განცხადებას ავრცელებს და განმარტავს, რომ დახურულ ოფისებსა და დაცულ ტერიტორიებზე, სადაც სპეციალური საშვების გარეშე შესვლა შეუძლებელია, თამბაქოს კვამლისგან გათავისუფლების კუთხით კანონის აღსრულება სერიოზულ გამოწვევად რჩება.

„თამბაქოს კონტროლის ალიანსი“ მოქალაქეებს მიმართავს, ნუ შეეგუებიან კანონის დარღვევას და აიძულონ დამსაქმებლები, პატივი სცენ მათ ჯანმრთელობასა და სიცოცხლეს. „მიუხედავად იმისა, რომ საქართველომ წარმატებით შეძლო საზოგადოებრივი თავშეყრის სივრცეების, კაფეებისა და რესტორნების თამბაქოს კვამლისგან გათავისუფლება, დახურულ ოფისებსა და დაცულ ტერიტორიებზე, სადაც სპეციალური საშვების გარეშე შესვლა შეუძლებელია, კანონის აღსრულება სერიოზულ გამოწვევად რჩება. სუფთა ჰაერი და ჯანსაღი სამუშაო გარემო არ არის ფუფუნება ან ვინმეს კეთილი ნება, ეს არის კანონით გარანტირებული ფუნდამენტური უფლება. სადაც სახელმწიფო მონიტორინგის ჯგუფები მყისიერად ვერ ხვდებიან, ვიზიტორები და თანამშრომლები ხშირად აწყდებიან რეალობას, - კვლავ ფუნქციონირებს ფარული „მოსაწევი ოთახები“, ან სამუშაო კაბინეტები თამბაქოს კვამლშია გახვეული. კოლეგებთან კონფლიქტის შიში და „კოლეგიალობის“ მცდარი გაგება ადამიანებს საკუთარი ჯანმრთელობის დაცვაში უშლის ხელს. განსაკუთრებით მივმართავთ ტელევიზიებსა და საინფორმაციო სააგენტოებს, საზოგადოებრივი აზრის მთავარ შემქმნელებს, როდესაც მედია ეთერში ჯანსაღ ცხოვრებასა და კანონის უზენაესობაზე საუბრობს, ხოლო კადრს მიღმა (სარეჟისოროში, სამონტაჟოში თუ ოფისში) თამბაქოს კონტროლის კანონს თავადვე არღვევს, სისტემურ ნიჰილიზმს აჩენს. გავრცელებული არგუმენტი „დაძაბული გრაფიკის“ შესახებ სამართლებრივად და მორალურად გაუმართლებელია. მწეველ ქირურგს, რომელიც მრავალსაათიან ურთულეს ოპერაციას ატარებს, ხომ არ მიეცემა უფლება, საოპერაციო ბლოკში მოითხოვოს მოსაწევი კუთხე? პროფესიული სტრესი ან დაძაბული გრაფიკი ვერასდროს გახდება სხვისი ჯანმრთელობის დაზიანების ლეგიტიმური საფუძველი! შეგახსენებთ, რომ დახურულ სივრცეში თამბაქოს (მათ შორის ელექტრონული სიგარეტისა და გასახურებელი თამბაქოს) მოწევისთვის პასუხისმგებლობა მკაცრია: საპატრულო პოლიცია (112) მყისიერად რეაგირებს გამოძახებაზე და აჯარიმებს დამრღვევ დაწესებულებას ან/და ფიზიკურ პირს. ფინანსური სანქციები დაწესებულებებისათვის: იურიდიული პირისთვის ჯარიმა პირველ ჯერზე 500 ლარია, განმეორებისას — 1 000 ლარია, ხოლო მესამე და ყოველ მომდევნო ჯერზე ერთი წლის განმავლობაში 2 000-2 000 ლარია. ფიზიკური პირისთვის: ჯარიმა პირველ შემთხვევაში შეადგენს 100 ლარს, განმეორებისას 200 ლარს, ხოლო მესამე და ყოველ მომდევნო ჯერზე ერთი წლის განმავლობაში შეადგენს 300-300 ლარს. კანონის სრულფასოვანი აღსრულებისთვის აუცილებელია: დარეკეთ 112-ზე ან მოკლე ტექსტური შეტყობინება გააგზავნეთ 112-ის მობილურ აპლიკაციაზე და მოითხოვოთ ანონიმურობა ან მიწერეთ ფეისბუქის გვერდის “ნუ მაბოლებ” ადმინისტრაციას, სადაც მნიშვნელოვანია გააზიაროთ სამართალდარღვევის ფაქტის ამსახველი ფოტო ან ვიდეო მასალა. ანონიმურობა აქაც დაცული იქნება.

მონიტორინგის გაძლიერება: „ჯანმრთელობის ხელშეწყობის“ სახელმწიფო პროგრამას უნდა გამოეყოს მეტი რესურსი თამბაქოს კონტროლის კანონმდებლობის აღსრულების მონიტორინგისათვის, რათა გეოგრაფიულად უფრო მასშტაბური გახდეს ე.წ. “ჩაკეტილ” სივრცეებში დარღვევების აღმოჩენა და მათზე ოპერატიული რეაგირება;

საინფორმაციო კამპანიები: ფართომასშტაბიანი ცნობიერების ამაღლების კამპანიები ასევე მნიშვნელოვანია, რათა დასაქმებულებმა თავიანთი უფლებები იცოდნენ. მოგიწოდებთ ყველას, ნუ ითმენთ მეორად კვამლს, ნუ შეეგუებით კანონის დარღვევას და აიძულეთ დამსაქმებლები, პატივი სცენ თქვენს ჯანმრთელობასა და სიცოცხლეს!“ -აღნიშნულია „თამბაქოს კონტროლის ალიანსის“ განცხადებაში.