იაპონიაში მიწისძვრის შედეგად, სულ მცირე, 50 ადამიანი დაშავდა, - ინფორმაციას Reuters-ი იაპონიის საზოგადოებრივ მაუწყებელზე დაყრდნობით ავრცელებს.

იაპონიის საზოგადოებრივი მაუწყებლის ცნობით, კუნძულ კიუ-შიუზე, კუმამოტოს პრეფექტურაში მომხდარი 7.1 მაგნიტუდის სიმძლავრის მიწისძვრის შედეგად, სულ მცირე, 50 ადამიანი დაშავდა.

ასევე, გაზეთ Nikkei-ს ინფორმაციით, დაშავებულებს შორის არიან ადამიანები, რომლებიც მიწისძვრის დროს ჩქაროსნულ მატარებელში იმყოფებოდნენ.

იაპონიის საგანგებო სიტუაციების სამსახურის განცხადებით, მიწისძვრის შემდეგ Aeon-ის სავაჭრო ცენტრში აფეთქება მოხდა და შესაძლოა, შენობაში ადამიანები იყვნენ ჩარჩენილი.

ქვეყნის ხელისუფლებამ ძლიერი მიწისძვრის შემდეგ ცუნამის შესახებ გაფრთხილება გამოსცა, თუმცა მოგვიანებით გააუქმა.

მიწისძვრის შედეგად კუნძულზე გზები და ხიდები დაზიანდა, შენობები ჩამოინგრა და რამდენიმე ობიექტზე ხანძარი გაჩნდა. ასევე, კუნძულზე 40 000-ზე მეტ ოჯახს ელექტროენერგიის მიწოდება შეუწყდა, მატარებლების გადაადგილება შეჩერდა და კუმამოტოს აეროპორტში ფრენები გადაიდო ან გაუქმდა.