გულახდილი საუბრისთვის დავურეკე ირანის საგარეო საქმეთა მინისტრს აბას არაღჩის. დიპლომატია ნიშნავს პირდაპირ საუბარს, მაშინაც კი, როცა ეს რთულია, - ამის შესახებ უკრაინის საგარეო საქმეთა მინისტრი ანდრეი სიბიგა სოციალურ ქსელში წერს.

მისი თქმით, სატელეფონო საუბრის დროს ხაზი გაუსვა, რომ უკრაინის ყველა ქმედება მიზნად ისახავს მხოლოდ ქვეყნის რუსული აგრესიისგან დაცვას.

„ხაზგასმით აღვნიშნე, რომ ჩვენი მიზანია არასაჭირო ესკალაციის თავიდან აცილება. კიდევ ერთხელ გავიმეორე, რომ უკრაინის ყველა ქმედება მიზნად ისახავს მხოლოდ ჩვენი ქვეყნის დაცვას რუსული აგრესიისგან და არასდროს არის მიმართული სამოქალაქო გემების ან ადამიანების მიზანში ამოღებისთვის. ეს ასევე ეხება ირანის განცხადებებს მათი დაღუპული მოქალაქის და სამოქალაქო გემის შესახებ, რომელიც ბოლო ინციდენტის დროს სამიზნე გახდა. ჩვენი მიზანია რუსეთის აგრესიის წინააღმდეგ ბრძოლა, რაც ყველა ინციდენტის ძირითადი მიზეზია და სწორედ რუსეთია სრული პასუხისმგებლობა ყველა პროვოკაციასა და მსხვერპლზე“, - აცხადებს სიბიგა.

მისი თქმით, ირანელ კოლეგასთან საუბრისას ხაზი გაუსვა, რომ აუცილებელია თავის შეკავება იმ ნაბიჯების გადადგმისგან, რომელიც ესკალაციას იწვევს.

„ხაზი გავუსვი ესკალაციისკენ მიმართული ნებისმიერი ნაბიჯებისგან თავის შეკავების, ასევე უკრაინის წინააღმდეგ რუსეთის ომის მხარდაჭერის შეწყვეტის აუცილებლობას. ეს ომი უკანონოა და უნდა დასრულდეს. ჩვენი პოზიცია უცვლელი რჩება: ევროპა და ახლო აღმოსავლეთი იმსახურებენ სტაბილურობას, უსაფრთხოებას და მშვიდობას“, - აცხადებს სიბიგა.