მოსკოვის ცენტრში რესტორანში აფეთქება გაისმა, დაიღუპა 3 ადამიანი, 17 კი დაშავდა. ამის შესახებ ინფორმაციას რუსული სახელმწიფო მედია და ,,ტელეგრამ” არხები ავრცელებენ.

არსებული ინფორმაციით, აფეთქება მოსკოვის კუდრინის მოედანზე რესტორანში Balzi Rossi გაისმა, რომელიც კერძო ბანკეტისთვის იყო დახურული.

,,ტელეგრამ” არხების ცნობით, აფეთქების შედეგად 3 ადამიანი დაიღუპა, ხოლო კიდევ 17 მძიმე მდგომარეობაში იმყოფება.

ერთ-ერთი ,,ტელეგრამ” არხის ცნობით, რესტორანში რუსი გენერლის დაბადების დღის აღნიშვნა მიმდინარეობდა და რესტორნის მიმდებარედ ბევრი შავნომრიანი ავტომობილი იყო დაპარკინგებული. როგორც წესი, შავი ნომრები შეიარაღებული ძალებისა და სხვა ძალოვანი სტრუქტურების ავტომობილებისთვისაა განკუთვნილი. ამას გარდა, რესტორანთან ,,როსგვარდიის” ავტობუსიც იდგა. ,,ტელეგრამ” არხი აღნიშნავს, რომ ეს ინფორმაცია დადასტურებული არ არის და დამატებით შემოწმებას საჭიროებს.