რუსეთის რამდენიმე რეგიონზე დრონებით შეტევა განხორციელდა, მათ შორის სარატოვში ადგილობრივ ნავთობგადამამუშავებელ ქარხანაზე და ენგელსში - აეროდრომზე, - ინფორმაციას უკრაინული მედია „ტელეგრამ“ არხებზე დაყრდნობით ავრცელებს.

გავრცელებული ინფორმაციით, ხანძარი ნავთობგადამამუშავებელ ქარხანაში ორ ადგილას გაჩნდა.

სარატოვის ოლქის გუბერნატორმა დრონებით თავდასხმის ფაქტი დაადასტურა და განაცხადა, რომ სარატოვსა და ენგელსში სამოქალაქო ინფრასტრუქტურა დაზიანდა.

უკრაინული მედია წერს, რომ სარატოვის ნავთობგადამამუშავებელი ქარხანა რუსეთში ერთ-ერთი უძველესი ნავთობგადამამუშავებელი ქარხანაა. 2023 წლის მონაცემებით, მისი ნავთობგადამუშავების სიმძლავრე 4.8 მილიონი ტონა იყო.

აფეთქებების ხმა ასევე ისმოდა სამხედრო აეროდრომ „ენგელს-2“-ის მახლობლად.