ჩრდილოეთ კორეის სარაკეტო ქვედანაყოფი რუსეთში განლაგდა, - ინფორმაციას Reuters-ი უკრაინის მთავარ სადაზვერვო სამმართველოს წარმომადგენელზე დაყრდნობით ავრცელებს.

უკრაინის მთავარი სადაზვერვო სამმართველოს წარმომადგენელმა ანდრეი ჩერნიაკმა გამოცემას განუცხადა, რომ შესაძლოა, ჩრდილოეთ კორეის ქვედანაყოფი უკრაინაზე იერიშებისთვის 120 ბალისტიკური რაკეტითა და ექვსი რაკეტების გამშვები დანადგარით იყოს აღჭურვილი.

ანდრეი ჩერნიაკის ცნობით, ჩრდილოეთ კორეის ქვედანაყოფი დაახლოებით 90 სამხედრო მოსამსახურისგან შედგება და რუსეთი მათ განლაგებას ვორონეჟის ოლქში გეგმავს.

მისი თქმით, პერსონალისა და რაკეტების ნაწილი რუსეთში უკვე გაიგზავნა, თუმცა მათი საბოლოო რაოდენობის შესახებ მოლაპარაკებები მოსკოვსა და ფხენიანს შორის მომავალ თვეში გაიმართება.

ცნობისთვის, გასულ კვირას, 2025 წლის აგვისტოს შემდეგ პირველად, რუსეთმა უკრაინაზე იერიშის დროს ჩრდილოეთ კორეული რაკეტა გამოიყენა.