ისრაელის თავდაცვის ძალებმა (IDF) სამხრეთ ლიბანში, სრობინის მუნიციპალიტეტში „ჰეზბოლას“ ათობით მეტრის სიგრძის მიწისქვეშა გვირაბი გაანადგურა, - ამის შესახებ ინფორმაციას ისრაელის თავდაცვის ძალები სოციალურ პლატფორმა X-ზე ავრცელებს.

ისრაელის თავდაცვის ძალების განცხადებით, ოპერაცია 91-ე დივიზიის, მე-300 „ბარამის“ ბრიგადისა და საბრძოლო-საინჟინრო ელიტური დანაყოფის „იაჰალომის“ სამხედროებმა ჩაატარეს. სამხედრო ძალების ცნობით, ამ მიწისქვეშა მარშრუტს „ჰეზბოლა“ ისრაელის ძალების წინააღმდეგ ტერორისტული თავდასხმების მოსამზადებლად და განსახორციელებლად იყენებდა.

ამასთან, სამხრეთ ლიბანის უსაფრთხოების ზონაში მიმდინარე ოპერაციების ფარგლებში, „ქფირის“ ბრიგადის ჯარებმა გაანადგურეს საბრძოლო საშუალებების საწყობი, რომელშიც „ჰეზბოლას“ რაკეტები და გამშვები მოწყობილობები იყო.

IDF-ში აცხადებენ, რომ 91-ე დივიზიის ძალები განაგრძობენ ოპერაციებს სამხრეთ ლიბანში.