„ნაციონალური მოძრაობის" ერთ-ერთი ლიდერის, ანა წითლიძის განცხადებით, პარტიის მმართველობით საბჭოს შემადგენლობაში შემავალ 9 წევრს ეკისრება პასუხისმგებლობა, გარდამავალ პერიოდში განახორციელოს პარტიაში რეფორმები და პარტია გააძლიეროს.

როგორც წითლიძემ პარტიის ყრილობის დასრულების შემდეგ „ინტერპრესნიუსთან“ განაცხადა, ყრილობაზე პარტიის თავმჯდომარემ, თინა ბოკუჩავამ თავად განაცხადა, რომ ბევრად უფრო მნიშვნელოვანია პოლიტიკურ საბჭოში დარჩეს, როგორც პოლიტიკური საბჭოს წევრი.

„დღეს „ნაციონალური მოძრაობის“ მე-13 ყრილობა ჩატარდა. ამ ყრილობაზე წარმოდგენილი იყო რამდენიმე საკითხი - ეს იყო დროებითი მმართველობის საბჭოს არჩევა. ეს არის მთავარი მმართველი ორგანო, რომელმაც უნდა მართოს პარტია ამ გარდამავალ პერიოდში. წარმოდგენილი იყო 9 კანდიდატი, ეს კანდიდატები აირჩია ყრილობამ, შესაბამისად, ამ ადამიანებს დაგვეკისრება პასუხისმგებლობა, რომ იმ რეფორმების საბჭოსთან, რომელსაც ნანუკა ჟორჟოლიანი წარმოადგენს, უახლოეს 6 თვეში, ყველამ ერთად ვიმუშაოთ იმაზე, რომ პარტიაში განხორციელდეს რეფორმები და პარტია გაძლიერდეს.

თინა [ბოკუჩავა] წარმოდგენილი იყო მმართველობის საბჭოში, მას ჰქონდა 17-ი პოლიტიკური საბჭოს რეკომენდაცია. ჩვენი წესდების შესაბამისად და საბჭოს დადგენილების შესაბამისად პოლიტსაბჭოს 15 წევრს ჰქონდა უფლებამოსილება, რომ 3 კანდიდატი დაეყენებინა მათ შორის თინა იყო დასახელებული - წარდგენილი იყო ყრილობაზე, თუმცა ქალბატონმა თინამ თქვა, რომ ბევრად უფრო მნიშვნელოვანია პოლიტიკურ საბჭოში დარჩეს, როგორც პოლიტიკური საბჭოს წევრი და არა პარტიის მმართველობის საბჭოში“,- განაცხადა წითლიძემ.

შეგახსენებთ, „ერთიანი ნაციონალური მოძრაობის“ მმართველობითი საბჭოს ხელმძღვანელი, ირაკლი ფავლენიშვილი გახდა. ასევე, მმართველობითი საბჭოს შემადგენლობაში შედიან - პეტრე ცისკარიშვილი, ანი წითლიძე, გიორგი ჩალაძე, ლაშა ფარულავა, გიორგი ბოტკოველი, ლევან ბეჟაშვილი და პატიმრობაში მყოფი ირაკლი ნადირაძე.