დღეს ქვეყანას ჰყავს არაკომპეტენტური და კორუმპირებული ხელისუფლება, რომელიც ქვეყანაში მომხდარ ვერცერთ ფაქტზე პასუხისმგებლობას ვერ იღებს, - ამის შესახებ „გახარია საქართველოსთვის“ პარტიის წევრმა, ანა დადიანმა განაცხადა, რითაც ქვეყნის მასშტაბით ელექტროენერგიის გათიშვას გამოეხმაურა.

მისივე თქმით, ელემენტარულ ადმინისტრაციულ მმართველობას ვერ აწარმოებს ხელისუფლება და „საქართველოს მოქალაქეებს უწევთ თითქოს ველურ გარემოში ცხოვრება“.

„ფაქტია, დღეს საქართველოს ენერგოსისტემაში კრიზისია და ამას ადასტურებს ის, რომ საქართველოს მთელ ტერიტორიაზე სამჯერ ჩაქრა შუქი, რის შედეგადაც შეწყდა სარკინიგზო მიმოსვლა, მეტროსა და ლიფტებში გაიჭედნენ საქართველოს მოქალაქეები, შუქნიშნებმა შეწყვიტეს მუშაობა და ქვეყნის კრიტიკული ინფრასტრუქტურა გაჩერდა.

ეს ადასტურებს იმას, რომ დღეს ქვეყანას ჰყავს არაკომპეტენტური და კორუმპირებული ხელისუფლება, რომელიც ქვეყანაში მომხდარ ვერცერთ ფაქტზე პასუხისმგებლობას ვერ იღებს.

ცალსახაა, რომ პოლიტიკური და ლეგიტიმაციის კრიზისის მერე ქვეყანას უდგას მმართველობითი კრიზისი. ელემენტარულ ადმინისტრაციულ მმართველობას ვერ აწარმოებს ხელისუფლება და საქართველოს მოქალაქეებს უწევთ თითქოს ველურ გარემოში ცხოვრება. ეს იმიტომ, რომ არავინ პასუხს მათ არ სცემს, არ გამოსულა ეკონომიკის მინისტრი და განცხადება არ გაუკეთებია, არც პრემიერ-მინისტრს. საქართველოს მოქალაქეებისთვის არ აუხსნიათ რა მოხდა, რატომ ჩაქრა საქართველოს მთელ ტერიტორიაზე სამჯერ შუქი.

ის, რომ ქვეყანაში საკუთარ მოქალაქეებს არჩევანის უფლებას ართმევ, ამის შემდეგ არავის უნდა გაუკვირდეს, რომ ერთ კონკრეტულ პირზე იქნება ჩამოკიდებული ის პასუხისმგებლობა, რომელიც დღეს „ოცნების“ არცერთი გუნდის წევრს არ გააჩნია“, - აღნიშნა ანა დადიანმა.