მავნებლური და არასახელმწიფოებრივი საკითხები გვესმის ხელისუფლებისგან - საზოგადოებაში, მით უმეტეს პოლიტიკურ სპექტრში, არასდროს ყოფილა რუსოფილური მიდგომები , - ამის შესახებ „ევროპული საქართველოს“ თავმჯდომარემ, გიგი წერეთელმა განაცხადა, რომელიც აგვისტოს ომის 18 წლისთავთან დაკავშირებით დაღუპულთა ხსოვნისთვის პატივის მისაგებად მუხათგვერდის ძმათა სასაფლაოზე იმყოფებოდა.

მისივე თქმით, "ყურით მოთრეული" ამბავია, თითქოს, ვიღაცას ადრე რბილი დამოკიდებულება ჰქონდა რუსეთთან და ახლა გახდნენ რუსოფობები.

„რუსეთი ჰიბრიდულ ომს კვლავ აწარმოებს, მისთვის მიუღებელია საქართველოს დამოუკიდებლობა, განვითარება.

აბსოლუტურად უაღრესად მავნებლური და არასახელმწიფოებრივი საკითხები გვესმის დღეს არსებული ხელისუფლებისგან. განსაკუთრებით, ბოლო კვირას ახალი შემოტანილი ნარატივია, თითქოს, ვიღაცას ადრე რბილი დამოკიდებულება ჰქონდა რუსეთთან და ახლა გახდნენ რუსოფობები. წარმოუდგენელია, ყურით მოთრეული ამბავია. ვინც იცის მაშინდელი პოლიტიკური კონიუნქტურა, არავითარი გარედან მოხვეული ამბავი არ იყო, იყო მცდელობა 12 აგვისტოს შეთანხმება ყოფილიყო შესრულებული. ძალიან მნიშვნელოვანი ამბავი იყო და დაავიწყდა „ოცნებას" არ ახსენებენ იმ ვალდებულებას, რომელიც რუსეთს აქვს გაიყვანოს საოკუპაციო ჯარები და დევნილების დაბრუნებას შეუწყოს ხელი.

არასდროს საზოგადოებაში, მით უმეტეს პოლიტიკურ სპექტრში, ვისზეც საუბარია, ან წინა ხელისუფლების დროს, არასდროს ყოფილა რუსოფილური მიდგომები“,- აღნიშნა გიგი წერეთელმა.