რუსეთში, სიზრანის ნავთობგადამამუშავებელ ქარხანაზე თავდასხმა განხორციელდა, - ინფორმაციას უკრაინული მედია ავრცელებს.

მედიის ცნობით, თავდასხმა დრონებით განხორციელდა, რის შედეგადაც, რუსეთის სამარის ოლქში მდებარე სიზრანის ნავთობგადამამუშავებელ ქარხანას ხანძარი გაუჩნდა.

ასევე, რუსული „ტელეგრამ“ არხების ინფორმაციით, დრონებით თავდასხმა კრასნოდარის მხარეში მდებარე ილსკის ნავთობგადამამუშავებელ ქარხანაზეც მოხდა.

რუსული მედია წერს, რომ დრონების საფრთხის გამო კრასნოდარის აეროპორტი დროებით დაიხურა.

მოგვიანებით, რუსეთის საჰაერო ტრანსპორტის ფედერალურმა სააგენტომ („როსავიაციამ“) განაცხადა, რომ აეროპორტში დაწესებული შეზღუდვები მოიხსნა.