ჟურნალისტი კობა ლიკლიკაძე 2008 წლის რუსეთ-საქართველოს ომის დროს, გორის ჰოსპიტალთან დაკავშირებით მის მიერ გაკეთებულ განცხადებაზე განმარტებას კიდევ ერთხელ აკეთებს და მედიკოსებს ბოდიშს უხდის.

ლიკლიკაძე აცხადებს, რომ 2008 წლის რუსეთ-საქართველოს ომის დროს, გორის სამხედრო ჰოსპიტლიდან ექიმების წასვლის შესახებ მის მიერ გაკეთებულმა განცხადებამ სამხედრო მედიკოსების ღვაწლი შელახა.

“ეს განცხადება არათუ არაკორექტული იყო ჩემგან, არამედ სამხედრო მედიკოსების ღვაწლის შელახვა იყო. ეს განზრახვა არ მქონია. სიტყვა გამომრჩა, მაგრამ როგორი კონტექსტიც არ უნდა ყოფილიყო, ეგრევე მოვიხადე ბოდიში.

ეს იმ კატეგორიის შეცდომაა, რომელიც, ალბათ, იშვიათად დამიშვია და მომსვლია ჩემი ჟურნალისტური მოღვაწეობის განმავლობაში. დამნაშავე ვარ”, - განაცხადა კობა ლიკლიკაძემ.

შეგახსენებთ, ჟურნალისტმა კობა ლიკლიკაძემ ტელეკომპანია “პირველთან" საუბრისას განაცხადა, რომ პანიკის დროს, როდესაც სამხედრო ჰოსპიტლის ევაკუაცია მოხდა, ექიმებმა დაჭრილი ჯარისკაცები მიატოვეს. მოგვიანებით კობა ლიკლიკაძემ განმარტა, რომ პირდაპირ ეთერში საუბრისას სიტყვა გამორჩა, კონტექსტი არასწორად იყო აღქმული და მომხდარის გამო ბოდიში მოიხადა.