ქართულ ჯარს, ქართველ ჯარისკაცსა და საქართველოს არასოდეს დაუხვრეტია არცერთი ტყვე - ასე უპასუხა თავდაცვის მინისტრმა, ირაკლი ჩიქოვანმა ჟურნალისტების შეკითხვას, რომელიც „ნაციონალური მოძრაობის“ ერთ-ერთი ლიდერის, გიორგი ბარამიძის იმ განცხადებას შეეხებოდა, სადაც ის საუბრობს, რომ აფხაზეთში ომის დროს ქართველები ტყვეებს ხვრეტდნენ.

როგორც ჩიქოვანმა აღნიშნა, გია ბარამიძის განცხადება არის მტკნარი სიცრუე.

„ეს იყო მტკნარი სიცრუე, რაც მან თქვა. ეს იყო სიბრიყვე და მოღალატეობრივი განცხადება. კარგად მესმის ჩვენი ვეტერანების, მათი პოზიციის, იმიტომ, რომ ეს არის მათთვის შეურაცხმყოფები. ქართულ ჯარს, ქართველ ჯარისკაცსა და საქართველოს არასოდეს დაუხვრეტია არცერთი ტყვე“,- განაცხადა ჩიქოვანმა.

შეგახსენებთ, საქართველოს გენერალურმა პროკურატურამ სამშობლოს ღალატის და საბოტაჟის ფაქტზე გამოძიება დაიწყო. კერძოდ, საქმე ეხება, „ნაციონალური მოძრაობის“ ერთ-ერთი ლიდერის, გიორგი ბარამიძის მიერ იაგო ხვიჩიასთვის მიცემულ ინტერვიუს, სადაც ის აღნიშნავს, რომ რომ აფხაზეთში ომის დროს „ჩვენ ტყვეები არ გვყავდა, ჩვენებს ტყვეები არ აჰყავდათ, ჩვენები ხვრეტდნენ“. ამის შემდეგ, აღნიშნულთან დაკავშირებით განმარტება გააკეთა გიორგი ბარამიძემ, რომელმაც აღნიშნა, რომ „მდგომარეობა, რომელზეც ის საუბრობს, მოგვიანებით, კერძოდ კი, მისი ჩასვლის შემდეგ შეიცვალა და „რომ არ შეცვლილიყო, ისინი ვერ შეძლებდნენ ქართველი 200 ტყვის გაცვლას სეპარატისტულ მხარესთან“. მოგვიანებით კი გიორგი ბარამიძემ განაცხადა, რომ „ომის პირველ დღეებში, ტყვეების გაცვლის, თუ სხვა მძიმე პროცესების აღსაწერად, სხვა სიტყვის გამოყენება აჯობებდა“. „არასდროს მითქვამს, რომ ჩვენები ხელებაწეულს ან დატყვევებულს „ხვრეტდნენ", ეგ არასდროს მინახავს და არც რაიმე ფაქტი ვიცი“, - განაცხადა ბარამიძემ.