ალექსანდროვსკის მიმართულებაზე შეტევის შედეგად უკრაინელმა სამხედროებმა 26 სოფელი გაათავისუფლეს. ამის შესახებ ინფორმაციას უკრაინის პრეზიდენტი, ვოლოდიმირ ზელენსკი სოციალურ ქსელში ავრცელებს.

მისი თქმით, სამხედრო ხელმძღვანელობამ მას ანგარიში ჩააბარა ალექსანდროვსკის მიმართულებაზე ოპერაციის შედეგებზე, რომლის დროსაც იანვრიდან აგვისტოს ჩათვლით უკრაინის სადესანტო-საშტურმო ძალებმა სხვა ქვედანაყოფებთან ერთად სამ ოლქში 26 სოფელი გაათავისუფლეს.

“ჩვენი ძალების აქტიური ქმედებების შედეგად შევძელით ძლიერად დარტყმა საოკუპაციო კონტინგენტზე. რუსების დანაკარგები არანაკლებ 9 550 მოკლული და 6 600-ზე მეტი დაჭრილია. ასევე, შეივსო უკრაინის გაცვლითი ფონდი”, - განაცხადა ზელენსკიმ.

მან აღნიშნა, რომ ოპერაციის მსვლელობისას უკრაინამ 745 კვადრატული კილომეტრი ტერიტორიის გათავისუფლება შეძლო და უკრაინის კონტროლის ქვეშ დნეპრის, დონეცკისა და ზაპოროჟიეს ოლქების 26 სოფელი დაბრუნდა.