ადგილობრივების ინფორმაციით, მძღოლი, რომელიც გომის მთაზე ავტოსაგზაო შემთხვევისას მიკროავტობუსს მართავდა, დაშავებულია და კლინიკაშია გადაყვანილი.

მათივე ცნობით, სულ ცოტა 18 ადამიანი იჯდა მიკროავტობუსში, რომელიც ხეს დაეჯახა.

“სამწუხარო ფაქტია, ჯერ ითქვა ორი ადამიანია გარდაცვლილიო, შემდეგ ოთხამდე გაიზარდა დაღუპულთა რიცხვი, როგორც ვიცი, უცხოელია ყველა.

საჭესთან ქართველი მძღოლი იჯდა, ის მართავდა, ისიც დაშავებულია და კლინიკაშია გადაყვანილი. ბჟუჟჰესთან არის ავარია მომხდარი. გომისმთიდან მოდიოდნენ, ხრამში გადავარდა მიკროავტობუსი და ხემ შეაჩერაო. ბელარუსის ოთხი მოქალაქე დაიღუპა. საავადმყოფოში იყვნენ გადაყვანილები დანარჩენები. როცა დაბლა ჩამოვიდნენ, იქ არის ავარია მომხდარი. როგორც ჩემმა თანამშრომელმა მითხრა, ხეს დაეჯახა მანქანა, მუხრუჭებიდან გამომდინარეო. ზუსტად რამ გამოიწვია არ ვიცი. გზა ძალიან კარგად არის გაკეთებული. როგორც გავიგე, ბავშვებიც იყვნენ და ძალიან მძიმედ არიან დაშავებულები, ისინი გადაყვანილები არიან საავადმყოფოში. მეტი დაზუსტებული არაფერი ვიცი. ძალიან ბევრი ტურისტი დადის, განსაკუთრებით ბელარუსები, უზბეკები - ჯგუფებად დადიან. სულ ცოტა 18 ადამიანი იჯდა. საშინელი ამბავი მოხდა, თან ჩამოსულები იყვნენ უკვე დაბლა, მთიდან რომ დაეშვები, იქ სამი გორაა გადმოსასვლელი, ერთია ეს მიხვეულ-მოხვეული გზები და დაბლა რომ ჩამოდიხარ, იქ არ არის საფრთხე, რამდენიმე ნაბიჯში უკვე სოფელი გომი იწყება და თითქმის დაბლა არიან ჩამოსული, სამშვიდობოს ჩამოსულებს დაემართათ ეს უბედურება. ხეს დასჯახებია, მერე ის ხე გადატყდაო. იქვე ხრამში არ ჩაცვივდნენ, ხემ შეაჩერაო”, - ამბობს ადგილობრივი „კვირის პალიტრასთან“.

მიკროავტობუსის მძღოლის მეზობელი სოციალურ ქსელში წერს, რომ მძღოლს ორსული ცოლი ჰყავს და ის ახლახან დაოჯახდა.

“ეს მანქანა სულაც არ იყო ძველი, ნუ წერთ ჯართიაო. პირიქით, ახალი მიკროავტობუსი იყო, სპრინტერი „მერსედესის“ მარკის. ახლახან იყიდა, ჩამოაყვანინა დიდი ხანი არცაა გასული, საათივით იყო გამართული. რა მოხდა არ ვიცი და ძალიან ვწუხვარ, საოცარი ბიჭია, საოცარი ოჯახი აქვს. ჩემი მეზობელია. თვითონაც საავადმყოფოში ჰყავთ ჯერ. ორსული ცოლი ჰყავს, ახლახან დაოჯახდა. ეს ბიჭი თბილისის ხაზზე მუშაობდა. ძალიან თანამედროვე მიკროავტობუსი იყო. რა მოხდა, არ ვიცი, ვფიქრობ, უბრალოდ მანქანამ უღალატა. ძლიერი მძღოლი იყო, არანაირი ნასვამი და არანაირი ჯართი, როგორც აქ წერენ," - წერს სოციალურ ქსელში მიკროავტობუსის მძღოლის მეზობელი.

ინფორმაციისთვის, წუხელ, გომის მთაზე ტურისტების მიკროავტობუსი ხრამში გადავარდა, შედეგად 4 ადამიანი დაიღუპა.

არსებული ცნობებით, მიკროავტობუსს საქართველოს მოქალაქე მართავდა, მის სიცოცხლეს საფრთხე არ ემუქრება.

შსს-გამოძიება 276-ე მუხლით დაიწყო, რაც სატრანსპორტო მოძრაობისას წესების დარღვევას გულისხმობს, რამაც ადამიანის სიცოცხლის მოსპობა გამოიწვია.