უკრაინული დრონების დარტყმის შედეგად რუსეთის ქალაქ ორსკში ნავთობგადამამუშავებელმა ქარხანამ სრულად შეაჩერა მუშაობა. ამის შესახებ ინფორმაციას საინფორმაციო სააგენტო Reuters-ი ავრცელებს.

არსებული ინფორმაციით, რუსეთის ქალაქ ორსკში ნავთობგადამამუშავებელმა ქარხანამ სრულად შეაჩერა მუშაობა 11 აგვისტოს უკრაინული დარტყმის შემდეგ.

ორენბურგის ოლქის გუბერნატორის, ევგენი სოლნცევის თქმით, ნამსხვრევებმა საკვანძო ინფრასტრუქტურა დააზიანეს, რომლის შეკეთებაც ამ მომენტისთვის შეუძლებელია. ქარხნის აღჭურვილობა იმპორტირებულია, ამიტომ, სანქციების გამო, რემონტი შეიძლება 6 თვემდე გაიწელოს.

რეგიონის ხელისუფლება საწვავის სხვა რეგიონებიდან იმპორტირებისთვის ემზადება. ბენზინგასამართ სადგურებთან მოძრაობას პოლიცია და მოხალისეები არეგულირებენ.

ცნობისთვის, ორსკის ნავთობგადამამუშავებელი ქარხანა ყაზახეთის საზღვართან მდებარეობს, მოსკოვიდან 1470 კილომეტრის მოშორებით. ქარხანას წელიწადში 6 მილიონი ტონა ნავთობის გადამუშავება და ბენზინის, დიზელისა და საავიაციო საწვავის, მაზუთისა და ბიტუმის წარმოება შეუძლია.