გია ბარამიძის სამარცხვინო განცხადება ქვეყნის საზიანოდ იყო მიმართული - ეს არის უცხოური აგენტურის ფაქტობრივი გამოვლინება, რაც საზოგადოების თითოეულმა წევრმა დაინახა, - ამის შესახებ ჟურნალისტებს აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ განუცხადა.

ჯინჭარაძის თქმით, აქვს ინფორმაცია, რომ “მას შესთავაზეს, რომ შესაძლებელი იყო, აღნიშნული სიუჟეტი არ გაეშვათ, თუმცა ამ მოღალატეობრივი განცხადებების გავრცელება მისი ნებით მოხდა“.

“ეს არის ჩვენი და არა მარტო ჩვენი შეურაცხყოფა - პირველ რიგში, იმ ადამიანების შეურაცხყოფა, რომელთა სახელები დღეს ამ დაფაზეა [საქართველოს ტერიტორიული მთლიანობისთვის დაღუპულ გმირთა მემორიალი] ამოტვიფრული. როდესაც ადამიანი ასეთ განცხადებას აკეთებს, შეუძლებელია ქვეყანა გიყვარდეს და ქვეყანაზე ფიქრობდე“, - განაცხადა გიორგი ჯინჭარაძემ.

რაც შეეხება აფხაზეთის ომის დაწყებიდან 34 წლის გასვლას, მისი თქმით, "პრაგმატული სამშვიდობო პოლიტიკის საფუძველზე აუცილებლად აღსრულდება ის იდეა და მისია, რასაც ამ ადამიანებმა თავი მიუძღვნეს".

“დღეს ჩვენ პატივს მივაგებთ გმირებს, სამხედროებს, სამოქალაქო პირებს, ვინც ჩვენი საქართველოს გამო თავი გასწირეს და მოგვცეს მაგალითი, თუ როგორ უნდა გვიყვარდეს ქვეყანა და როგორ უნდა ემსახურო მას. მათი სახელი მარადიულია და კიდევ ბევრ თაობას გადაეცემა ღირსეულად“, - განაცხადა გიორგი ჯინჭარაძემ.