რუსეთი გაერთიანებულ სამეფოს უკრაინისთვის დრონების მიწოდების გამო შედეგებით ემუქრება, - ინფორმაციას Reuters-ი ავრცელებს.

„ლონდონის ქმედებებს გარდაუვალად მოჰყვება შედეგები, რისთვისაც მას პასუხი მოუწევს. რაც უფრო ღრმად იქნება ის ჩართული კონფლიქტში და რაც უფრო მეტად დაუჭერს მხარს კიევის ტერორისტულ მანქანას, მით უფრო მაღალ ფასს გადაიხდის“, - ნათქვამია საელჩოს განცხადებაში.

რუსეთის საელჩოს ამ განცხადებას გაერთიანებული სამეფოს თავდაცვის სამინისტრო გამოეხმაურა და აღნიშნა, რომ ვალდებულები არიან, უკრაინას მიაწოდონ აღჭურვილობა, რომელიც რუსეთის პრეზიდენტ ვლადიმერ პუტინის უკანონო შეჭრისგან თავის დასაცავად სჭირდება.

„გაერთიანებული სამეფო უკრაინის გვერდით დგას და ჩვენ ვალდებულნი ვართ, უკრაინას მივაწოდოთ აღჭურვილობა, რომელიც პუტინის უკანონო შემოჭრისგან თავის დასაცავად სჭირდება“, - აღნიშნულია უწყების განცხადებაში.

ლონდონში რუსეთის საელჩომ შაბათს გაზეთ Times-ში გამოქვეყნებულ სტატიას უპასუხა, რომელშიც ნათქვამი იყო, რომ ბრიტანეთში წარმოებული დრონები რუსეთის წინააღმდეგ შორ მანძილზე დარტყმებისთვის გამოიყენეს.