„მოძრაობა კულტურული მემკვიდრეობისთვის“ რუსთაველის გამზირზე მიმდინარე სარეაბილიტაციო სამუშაოებს ეხმაურება და სპეციალურ მიმართვას ავრცელებს.

„მოძრაობა კულტურული მემკვიდრეობისთვის“ განცხადებით, „თავისუფლების მოედნის“ მეტროსა და საქართველოს ეროვნული მუზეუმს შორის მონაკვეთში აღმოჩენილია აგურის წყობები, სავარაუდოდ, XIX საუკუნის ძველი „გარეთუბნის“ კოლექტორების სისტემა, ასევე სავარაუდოდ, X-XI საუკუნეების უამრავი კერამიკული ჭურჭელი.

მათივე ცნობით, უცნობია იმ სპეციალისტის ან სპეციალისტთა ჯგუფის ვინაობა, რომელიც კანონის შესაბამისად, არქეოლოგიურ ზედამხედველობას უნდა ახორციელებდეს სარეაბილიტაციო სამუშაოებზე. ამიტომ, „მოძრაობა კულტურული მემკვიდრეობისთვის“ მიმართავს შესაბამის ორგანოებს, დაიწყონ კონსულტაციები რუსთაველის გამზირზე გამოვლენილი არქეოლოგიური ფენებისა თუ არტეფაქტების შესასწავლად და პროექტის მიმდინარეობისას არქეოლოგიური საზედამხედველო პროცესის უკეთ კოორდინირებისთვის

„გვსურს გამოვეხმაუროთ რუსთაველის გამზირზე მიმდინარე სამუშაო პროცესს.

როგორც უკვე ცნობილია 23 ივლისს დედაქალაქის მთავარი გამზირის სარეაბილიტაციო სამუშაოები დაიწყო (სამუშაოების შემსრულებელი კომპანია „სმარტ სოლუშენსი“). სამუშაოების მიმდინარეობისას „თავისუფლების მოედნის“ მეტროსა და საქართველოს ეროვნული მუზეუმს შორის მონაკვეთში აღმოჩენილი იქნა აგურის წყობები, სავარაუდოდ, XIX საუკუნის ძველი „გარეთუბნის“ კოლექტორების სისტემა, ასევე ჩვენს ხელთ არსებული ინფორმაციით, სავარაუდოდ, X-XI საუკუნეების უამრავი კერამიკული ჭურჭელი.

აღნიშნულ მონაკვეთში სამუშაოები უკვე შეჩერებულია, თუმცა აქამდე უცნობია, იგეგმება თუ არა გამოვლენილი ფენების შესწავლა და რა ბედი ელით სამომავლოდ.

ასევე, დღემდე უცნობია იმ სპეციალისტის ან სპეციალისტთა ჯგუფის ვინაობა (ასეთის არსებობის შემთხვევაში), რომელიც კანონის შესაბამისად არქეოლოგიურ ზედამხედველობას უნდა ახორციელებდეს სარეაბილიტაციო სამუშაოებზე.

„მოძრაობა კულტურული მემკვიდრეობისთვის“ მიესალმება ყველა იმ პროექტს, რომელიც დედაქალაქის იერსახის გაუმჯობესებას ისახავს მიზნად, თუმცა ამავდროულად ძალიან მნიშვნელოვანია სამუშაო პროცესში დაცული იყოს კანონი „კულტურული მემკვიდრეობის შესახებ"(თავიIII, მუხლი10)

„მოძრაობა კულტურული მემკვიდრეობისთვის" მიმართავს კულტურის სამინისტროს, საქართველოს კულტურული მემკვიდრეობის დაცვის ეროვნულ სააგენტოს და დედაქალაქის მერიას დაიწყონ კონსულტაციები, კანონით განსაზღვრულ ვადებში რუსთაველის გამზირზე გამოვლენილი არქეოლოგიური ფენებისა თუ არტეფაქტების შესასწავლად და პროექტის მიმდინარეობისას არქეოლოგიური საზედამხედველო პროცესის უკეთ კოორდინირებისთვის",- აღნიშნულია ინფორმაციაში.