უკრაინის ანტიკორუფციულმა ორგანოებმა ჩხრეკა პრეზიდენტის ოფისის ხელმძღვანელის მოადგილის სამუშაო ადგილზე ჩაატარეს, - ინფორმაციას უკრაინული მედია ავრცელებს.

მედიის ცნობით, უკრაინის ეროვნულმა ანტიკორუფციულმა ბიურომ და სპეციალიზებულმა ანტიკორუფციულმა პროკურატურამ საგამოძიებო მოქმედებები ქვეყნის პრეზიდენტის ოფისის ხელმძღვანელის მოადგილის, ირინა მუდრას სამუშაო ადგილზე ჩაატარეს.

ასევე, ჩხრეკა ჩატარდა აკრძალული პარტიიდან „ოპოზიციური პლატფორმა - სიცოცხლისთვის“ არჩეული სახალხო დეპუტატის ვადიმ სტოლარის სახლშიც.

გავრცელებული ინფორმაციით, სტოლარი ამჟამად უკრაინაში არ იმყოფება.

როგორც უკრაინული მედია წერს, დანაშაულებრივი ორგანიზაციის წინააღმდეგ მიმდინარე საგამოძიებო საქმეში იუსტიციის სამინისტროსა და Sense Bank-ის წარმომადგენლები ფიგურირებენ.

ცნობისთვის, მანამდე, უკრაინის ანტიკორუფციულმა ორგანოებმა გამოაცხადეს, რომ „სპეცოპერაციას ატარებდნენ დანაშაულებრივი ორგანიზაციის გამოსავლენად, რომელიც უკრაინის მოქმედი და ყოფილი სახალხო დეპუტატების ხელმძღვანელობით, ასევე, უკრაინის პრეზიდენტის ოფისის მაღალჩინოსნებისა და სხვა პირების მონაწილეობით მოქმედებდა“.

უკრაინის ეროვნულმა ანტიკორუფციულმა ბიურომ ოპერაციას „ფორესტ გამპი“ უწოდა.