უკრაინის პრეზიდენტის ვოლოდიმირ ზელენსკის განცხადებით, ბოლო 24 საათის განმავლობაში უკრაინულმა ძალებმა იერიში მიიტანეს რუსეთის სამარის რეგიონში მდებარე ნოვოკუიბიშევსკის ნავთობგადამამუშავებელ ქარხანასა და რეგიონში მდებარე ლოგისტიკურ ცენტრზე.

ასევე დადასტურდა ოკუპირებულ ყირიმში, საკის აეროდრომზე რუსული „სუ-24მ“ თვითმფრინავის განადგურება.

პრეზიდენტის თქმით, ნოვოკუიბიშევსკის ნავთობგადამამუშავებელი ქარხანა ფრონტის ხაზიდან დაახლოებით 1000 კილომეტრში მდებარეობს და რუსეთისთვის ექსპორტიდან შემოსავალს გამოიმუშავებს, რომელიც ომის დასაფინანსებლად გამოიყენება.

ნოვოკუიბიშევსკის ნავთობგადამამუშავებელ ქარხანაზე თავდასხმა გენერალურმა შტაბმაც დაადასტურა.

ნავთობგადამამუშავებელი ქარხნის სიმძლავრე წელიწადში დაახლოებით 8,8 მილიონი ტონა ნავთობია და სხვა პროდუქტებთან ერთად, საავტომობილო და საავიაციო საწვავს, ასევე დიზელის საწვავს აწარმოებს.