ნატო-ს წევრები არ მალავენ, რომ არქტიკის ახალ ფრონტად გადაქცევა სურთ, რათა შეაფერხონ რუსეთისა და მისი მოკავშირეების განვითარება, - ამის შესახებ რუსეთის საგარეო საქმეთა მინისტრის, სერგეი ლავროვის, სტატიაშია აღნიშნული.

“ნატო და სხვა დასავლელები არ მალავენ თავიანთ ნამდვილ მოტივებს და აცხადებენ, რომ მათი მიზანია არქტიკა დაპირისპირების ახალ ფრონტად გადააქციონ, რათა შეაფერხონ ჩვენი ქვეყნის და მისი მსგავსი აზროვნების მქონე ქვეყნების განვითარება”, - წერს ლავროვი.

მისი მტკიცებით, ნატო-ს წევრი სახელმწიფოების ქმედებები არქტიკაში რუსეთისთვის პირდაპირ საფრთხეს წარმოადგენს.

„ჩვენი ჩრდილოეთ საზღვრების სიახლოვეს ინტენსიური სამხედრო მზადება მიმდინარეობს. ტარდება მასშტაბური, აგრესიული მიმართულების წვრთნები, რომლებშიც მონაწილეობენ რეგიონის არა წევრი ქვეყნები და ჩნდება ნატო-ს სამეთაურო-საშტაბო სტრუქტურის ახალი ელემენტები. შორეულ ჩრდილოეთში ასეთი სამხედრო აქტივობა პირდაპირ საფრთხეს უქმნის რუსეთის უსაფრთხოებას. იზრდება ინციდენტების რისკი, რომლებმაც შეიძლება გამოიწვიოს შეიარაღებული დაპირისპირება პოტენციურად კატასტროფული შედეგებით,“ - წერს ლავროვი.

მისი თქმით, რუსეთი სათანადოდ უპასუხებს თავისი ოპონენტების ნებისმიერ „მტრულ ქმედებას“.

„არამეგობრული, მტრული ქმედებები იღებს და კვლავაც მიიღებს ადეკვატურ პასუხს, მათ შორის ასიმეტრიულს“,- აცხადებს რუსეთის საგარეო უწყების ხელმძღვანელი.