ევროპის კოსმოსური პროგრამა უნდა გავაძლიეროთ, - ამის შესახებ საფრანგეთის პრეზიდენტმა, ემანუელ მაკრონმა პარიზში, კოსმოსურ საკითხებზე მიმდინარე საერთაშორისო სამიტზე სიტყვით გამოსვლისას განაცხადა.

„კოსმოსი ერთადერთ გლობალურ სივრცეს წარმოადგენს, რომელიც არსებული რისკების შესაბამის რეგულაციებს არ ექვემდებარება. ამ გამოწვევებთან გამკლავების მიზნით ერთობლივი მმართველობაა აუცილებელი. საფრანგეთს უნიკალური კოსმოსური ისტორია აქვს. აქ კოსმოსური პოლიტიკა ყოველთვის თანამშრომლობაზე იყო დაფუძნებული“, - განაცხადა მაკრონმა.

მისი თქმით, სამიტის ფარგლებში 51-ზე მეტი შეთანხმება გაფორმდება, რომლებიც 20 მილიარდი ევროს ინვესტიციას ითვალისწინებს.

ასევე, საფრანგეთის პრეზიდენტმა აღნიშნა, რომ ევროპამ კოსმოსში საკუთარი პილოტირებადი ფრენები უნდა განავითაროს.

„გვსურს, რომ ევროპამ პილოტირებადი კოსმოსური ფრენების სფეროში საკუთარი ამბიცია აჩვენოს. მსურს ვიხილო, თუ როგორ აფრინდება 10 წელიწადში კურუდან პირველი პილოტირებადი კაფსულა, რომლის ბორტზე ევროპელი და სხვა ქვეყნების ასტრონავტები იქნებიან. ჩვენ ტემპი უნდა დავაჩქაროთ. ევროპულ ინტერესს პრიორიტეტი უნდა მივანიჭოთ. ეს არც ბინძური სიტყვაა და არც პროტექციონიზმი. ეს გულუბრყვილობაზე უარის თქმას წარმოადგენს“, - აღნიშნა საფრანგეთის პრეზიდენტმა.