ევრობიუროკრატები ოფიციალურ ვაშინგტონს უპირისპირდებიან - მათი საუბრები მიანიშნებს, როგორ კრიზისშია დღეს ევრობიუროკრატია, განსაკუთრებით, დიპლომატიის თვალსაზრისით, - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა განაცხადა, რითაც გამოეხმაურა გაფართოების საკითხებში ევროკომისრის, მარტა კოსის განცხადებას, რომ „ევროკავშირში გაწევრიანების მსურველმა ქვეყნებმა დონალდ ტრამპის MAGA-ს მოძრაობასთან კავშირები უნდა გაწყვიტონ, რათა ორგანიზაციის წევრობა შეძლონ.

მისივე თქმით, მარტა კოსის განცხადება ძალიან სერიოზული სიგნალია თვითონ ევროპული ინსტიტუტებისთვის.

“ჩვენ ვხედავთ, რომ ევრობიუროკრატები საბოლოო ჯამში, უპირისპირდებიან ოფიციალურ ვაშინგტონს და ამერიკის შეერთებულ შტატებს, კონკრეტულად, პრეზიდენტს და იმ იდეას, რომლის საფუძველზეც, დონალდ ტრამპს ამერიკულმა საზოგადოებამ მხარი დაუჭირა და ის მეორედ გახდა ამ ქვეყნის პრეზიდენტი. ამ ფონზე, მათი საუბრები ნამდვილად მიანიშნებს ერთადერთზე - დღეს როგორ კრიზისშია ევრობიუროკრატია, განსაკუთრებით, დიპლომატიის თვალსაზრისით. თუ ამას დავამატებთ იმას, რომ ფაქტობრივად, იგივე კალასი არც უფიქრდება და არც არაფრად აგებს აშშ-ის სახელმწიფო დეპარტამენტის ხელმძღვანელს, კიდევ ერთხელ ვხედავთ იმ კრიზის, რომელიც არის ევრობიუროკრატიაში. ეს არის ძალიან სერიოზული სიგნალი თვითონ ევროპული ინსტიტუტებისთვის, რომელიც დღეს სამწუხაროდ, ასეთი არაკვალიფიციური, არაკომპეტენტური ბიუროკრატების ქვეშ არის, რომელსაც ევროპის ინტერესები, ფაქტია, საერთოდ არ აინტერესებს,” - განაცხადა იონათამიშვილმა.

ცნობისთვის, გაფართოების საკითხებში ევროკომისარმა, მარტა კოსმა განაცხადა, რომ კანდიდატმა ქვეყნებმა ევროკავშირში გაწევრიანებისთვის დონალდ ტრამპის მოძრაობა MAGA-სთან კავშირები უნდა გაწყვიტონ.

„არ უნდა გავრისკოთ ის, რომ ჩვენმა მომავალმა წევრებმა სხვებზე ისეთი დამოკიდებულებები შეიქმნან, რომელიც ჩვენს გრძელვადიან ინტერესებთან წინააღმდეგობაში იქნება“, - განაცხადა კოსმა „ევროპული პოლიტიკის კვლევის ცენტრის“ მიერ ორგანიზებულ ღონისძიებაზე.