ირაკლი ლექვინაძის განცხადებით, დარღვევად იქნება მიჩნეული ყველა შემთხვევა, როცა პროდუქტის შეფუთვის დიზაინი, ეტიკეტირება და ვიზუალი პროდუქტის წარმომავლობისა და შემადგენლობის შესახებ მომხმარებლისთვის მცდარ შთაბეჭდილებას შექმნის
კონკურენციის და მომხმარებლის დაცვის სააგენტოს თავმჯდომარის ირაკლი ლექვინაძის განცხადებით, დარღვევად იქნება მიჩნეული ყველა შემთხვევა, როცა პროდუქტის შეფუთვის დიზაინი, ეტიკეტირება და ვიზუალი პროდუქტის წარმომავლობისა და შემადგენლობის შესახებ მომხმარებლისთვის მცდარ შთაბეჭდილებას შექმნის.
ასეთი შემთხვევის გამოვლენის თაობაზე ლექვინაძემ პარლამენტის ადამიანის უფლებათა დაცვის კომიტეტში ისაუბრა, სადაც სააგენტოს საქმიანობის 2025 წლის ანგარიში წარადგინა.
„კონკრეტულ წვენს ეტიკეტირებაზე ეწერა, რომ ალუბლის წვენი იყო. სინამდვილეში მისი ძირითადი კონცენტრაციით ვაშლის წვენი იყო. ჩვენ კომპანიას ეს პრაქტიკა შევაცვლევინეთ. მან აღნიშნული პროდუქტი ქსელიდან მთლიანად ამოიღო. მომავალში ნებისმიერი მსგავსი შემთხვევა დარღვევად იქნება განხილული. მომხმარებელმა უნდა იცოდეს, რა პროდუქტს მოიხმარს და ეს არის ძალიან მნიშვნელოვანი“, - განაცხადა ირაკლი ლექვინაძემ პარლამენტის ადამიანის უფლებათა დაცვის კომიტეტის სხდომაზე.
