რუსი სამხედროები თავიანთ ამოცანებს უკრაინის მთელ ტერიტორიაზე ასრულებენ, - ამის შესახებ კრემლის პრესსპიკერმა, დიმიტრი პესკოვმა განაცხადა.

პესკოვმა კომენტარი უკრაინა-პოლონეთის საზღვართან ახლოს სამგზავრო მატარებლის ლოკომოტივზე რუსეთის მიერ დრონებით განხორციელებულ იერიშთან დაკავშირებით გააკეთა.

„თუ სწორად გავიგე, საუბარი უკრაინის ტერიტორიაზეა. ჩვენი სამხედროები თავიანთ ამოცანებს უკრაინის მთელ ტერიტორიაზე ასრულებენ და ამის გაგრძელებას აპირებენ“, - აღნიშნა პესკოვმა.

ცნობისთვის, 13 სექტემბერს რუსეთმა დრონებით თავდასხმა უკრაინა-პოლონეთის საზღვრის მახლობლად მდებარე იაგოდინის სადგურზე მყოფ სამგზავრო მატარებლის ლოკომოტივზე განახორციელა. უკრაინის სახელმწიფო რკინიგზის კომპანიამ „უკრზალიზნიცამ“ განაცხადა, რომ შესაძლოა, დრონებით დარტყმის სამიზნე დიპლომატიური მატარებელი იყო, რომელიც ლოკომოტივის დაბომბვამდე ცოტა ხნით ადრე, იაგოდინის სადგურზე იდგა. მატარებელში ევროკავშირის რამდენიმე წევრი სახელმწიფოს უსაფრთხოების მრჩევლები და ყოფილი ლიდერები იმყოფებოდნენ, მათ შორის დიდი ბრიტანეთის ყოფილი პრემიერ-მინისტრი ბორის ჯონსონი.