გერმანიის სამხედრო ავიაბაზიდან ერთ კილომეტრში უცნობი დრონი ჩამოვარდა. ამის შესახებ ინფორმაციას გერმანული გამოცემა Bild-ი ავრცელებს.

კერძოდ, აღინიშნება, რომ გერმანიაში შტაინჰუდეს ტბის აღმოსავლეთით (ჰანოვერის მახლობლად) დრონების ნამსხვრევების აღმოჩენის შემდეგ მასშტაბური საპოლიციო ოპერაცია გრძელდება.

მედიის თანახმად, ამ დროისთვის, სამართალდამცავი ორგანოების მრავალი თანამშრომელი აგრძელებს დრონის ნამსხვრევების ძიებას. კრიმინალური პოლიციის სახელმწიფო სამმართველოს (LKA) ინფორმაციით, დრონი უკაცრიელ ღია სივრცეში ჩამოვარდა.

აღინიშნება, რომ ეს ტერიტორია ვუნტსტორფში გერმანიის შეიარაღებული ძალების ავიაბაზიდან სულ რაღაც ერთი კილომეტრის მოშორებით მდებარეობს, რაც გერმანიის შეიარაღებულმა ძალებმა გამოცემა Bild-ს დაუდასტურეს.

ასევე, მედია აღნიშნავს, რომ გამომძიებლებმა დრონის ნამსხვრევების შესახებ ორშაბათიდან იციან. LKA-ის ცნობით, არ მომენტისთვის მოსახლეობისთვის არანაირი საფრთხის ნიშნები არაა, თუმცა ნამსხვრევების ძიება გაგრძელდება.