Reuters - ევროკავშირის ელჩები რუსეთის წინააღმდეგ დაწესებული სანქციების სიიდან ალიშერ უსმანოვისა და მიხაილ ფრიდმანის ამოღების საკითხზე შეთანხმდნენ
ევროკავშირის ელჩები რუსეთის წინააღმდეგ დაწესებული სანქციების სიიდან უსმანოვისა და ფრიდმანის ამოღების საკითხზე შეთანხმდნენ, - ინფორმაციას Reuters-ი ევროპელ დიპლომატებზე დაყრდნობით ავრცელებს.
გამოცემის ინფორმაციით, ევროკავშირი რუს ოლიგარქებს ალიშერ უსმანოვსა და მიხაილ ფრიდმანს სანქციებს მოუხსნის, იმ პირობით, რომ უახლოესი რამდენიმე საათის განმავლობაში ევროკავშირის წევრი რომელიმე ქვეყანა გადაწყვეტილებას არ გააპროტესტებს.
დიპლომატების ცნობით, შეთანხმების ფარგლებში ევროკავშირი ათასობით რუსი ფიზიკური და იურიდიული პირის წინააღმდეგ დაწესებულ სანქციებს სამი წლის ვადით გაახანგრძლივებს.
როგორც ცნობილია, რუსეთის წინააღმდეგ სანქციების რეჟიმის გახანგრძლივებას ხელს სწორედ უსმანოვისა და ფრიდმანის სიიდან ამოღების საკითხი უშლიდა. გავრცელებული ინფორმაციით, სლოვაკეთი სიიდან ორივე მათგანის ამოღებას ითხოვდა, ხოლო საფრანგეთმა უსმანოვის ამოღების საკითხი დააყენა.
ევროკავშირის მიერ რუსეთის წინააღმდეგ დაწესებული სანქციების მოქმედების ვადა 22 სექტემბერს, შუაღამისას იწურება.
