ლე პენის პარტია რუსოფობიური გახდა, - ამის შესახებ რუსეთის უშიშროების საბჭოს თავმჯდომარის მოადგილემ, დიმიტრი მედვედევმა განაცხადა.

დიმიტრი მედვედევი ფრანგული ულტრამემარჯვენე პარტია „ეროვნული გაერთიანების“ ლიდერების, მარინ ლე პენისა და ჯორდან ბარდელას განცხადებას გამოეხმაურა, რომელშიც ფრანგმა პოლიტიკოსებმა რუსეთის პრეზიდენტის, ვლადიმერ პუტინის განკარგულებას, რომელიც ფრანგული კომპანია Auchan-ის რუსული აქტივების „დროებით მმართველობაში“ გადაცემას ითვალისწინებს, „მტრული აქტი“ უწოდეს.

„ლე პენმა რუსეთის მიერ Auchan-ის აქტივებზე კონტროლის დაწესებას „მტრული ქმედება“ უწოდა. ათასობით სანქციაა დაწესებული რუსების წინააღმდეგ საფრანგეთში, აღარაფერს ვამბობ კიეველი დეგენერატებისთვის რაკეტების მიწოდებაზე - ეს მეგობრული იყო? როგორც ჩანს, ლე პენის პარტია ახლა ჩვეულებრივ ევროპულ პარტიად იქცა: რუსოფობია და კიეველი ნაცისტების მხარდაჭერა“, - განაცხადა მედვედევმა.

ცნობისთვის, მარინ ლე პენმა და ჯორდან ბარდელამ ერთობლივ განცხადებაში აღნიშნეს, რომ „რუსეთს დაშინებით, მუქარებით, დესტაბილიზაციითა და ფსიქოლოგიური ზეწოლით საფრანგეთის პოლიტიკის კარნახი არ შეუძლია“.

„არანაირ პროვოკაციას, არანაირ საიდუმლო ოპერაციას, და არანაირ დესტაბილიზაციურ ქმედებას არ შეუძლია საფრანგეთი აიძულოს ხელი შეუწყოს რუსეთისთვის უკრაინაში საომარი მიზნების მიღწევას“, - ნათქვამია ლე პენისა და ბარდელას განცხადებაში.