იაპონიაში ოთხი ადამიანი დაიღუპა მას შემდეგ, რაც ტაიფუნ „დუჯუანის“ გამო ტოკიოსა და მიმდებარე პრეფექტურებს ძლიერი წვიმები და დამანგრეველი ქარი დაატყდა თავს, - ინფორმაციას BBC-ი იაპონურ მედიაზე დაყრდნობით ავრცელებს.

გამოცემის ცნობით, დაღუპულები კანაგავასა და ჩიბას პრეფექტურებში მეწყრულ პროცესებს ემსხვერპლნენ. ამ დროისთვის, ექვსი ადამიანი დაკარგულად ითვლება.

სტიქიამ ელექტროენერგიის გარეშე დატოვა 50 000 ადამიანი და ასობით ავიარეისის გაუქმება გამოიწვია.

ორშაბათს, ქარიშხლის პიკის დროს, ხელისუფლებამ მოსახლეობა „სიცოცხლისთვის უშუალო საფრთხის“ არსებობის შესახებ გააფრთხილა და 1.9 მილიონ ადამიანს თავშესაფრებში გადასვლისკენ მოუწოდა. დღეს კი, მას შემდეგ, რაც ქარიშხალი იაპონიის აღმოსავლეთ სანაპიროს მოშორდა, ევაკუაციის შესახებ გაცემული ბრძანებების უმეტესობა გაუქმდა.