ე.წ. ჩორჩანას საქმეზე, თბილისის საქალაქო სასამართლოში, ამ წუთებში იკითხება იმ პერიოდის სუს-ის უფროსის ყოფილი მოადგილე ალექსანდრე ტაბატაძე, რომელიც ამჟამად პარლამენტის თავდაცვისა და უსაფრთხოების კომიტეტის თავმჯდომარეა.

ასევე, დღევანდელ პროცესზე დაიკითხებიან, საქართველოს მთავრობის ადმინისტრაციის ყოფილი უფროსი, კახა კახიშვილი და შიდა ქართლის ყოფილი გუბერნატორი, გიორგი ხოჯევანიშვილი.

ცნობისთვის, საქმეზე ყოფილი შს და ყოფილი პრემიერ-მინისტრი გიორგი გახარიაა ბრალდებული. გიორგი გახარიას ე.წ. ჩორჩანას საქმეზე ბრალდება საქართველოს სისხლის სამართლის კოდექსის 25, 117-ე მუხლის მე-3 ნაწილის „მ“ ქვეპუნქტით და 333-ე მუხლის მე-2 ნაწილით აქვს წარდგენილი, რაც სასჯელის სახედ და ზომად 13 წლამდე თავისუფლების აღკვეთას ითვალისწინებს.ბრალის მიხედვით, გიორგი გახარიამსაოკუპაციო ხაზის გასწვრივ სოფელ ჩორჩანასთან დამატებითი საპოლიციო საგუშაგოს აღმართვის შესახებ გადაწყვეტილება ერთპიროვნულად მიიღო, რის შედეგადაც, საოკუპაციო ძალების კონტროლქვეშ აღმოჩნდა დაახლოებით ასი ჰექტარი ტყის მასივი. ადგილი ჰქონდა სხვადასხვა უკანონო აქტივობებს, მძიმე სამხედრო ტექნიკის გადაადგილებას დასახლებული პუნქტებისკენ. ოკუპირებულ ტერიტორიაზე დამატებით მოექცა ხაშურის მუნიციპალიტეტის სოფლების ყობისა და წნელისის მკვიდრთა საცხოვრებელი სახლები.