გაეროს გენერალური ასამბლეის ფარგლებში გამართულ ყველა შეხვედრაზე ჩვენ ვმუშაობთ უკრაინისთვის მხარდაჭერის შენარჩუნების უზრუნველსაყოფად, - ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს, სადაც რუსეთის მიერ კიევზე განხორციელებულ თავდასხმას ეხმაურება.

მისი თქმით, დილიდან მიმდინარეობს მუშაობა თავდასხმის შედეგების აღმოსაფხვრელად. ზელენსკის ინფორმაციით, რუსებმა ქალაქის წინააღმდეგ ბევრი დრონი გაუშვეს, რომელთაგან მნიშვნელოვანი ნაწილი რეაქტიული ძრავით იყო აღჭურვილი.

“რუსეთი აგრძელებს სამოქალაქო და კრიტიკული ინფრასტრუქტურის სამიზნეებად ქცევას: ფარმაცევტული ობიექტების, ბენზინგასამართი სადგურების, რკინიგზის, საკომუნიკაციო ინფრასტრუქტურისა და სავაჭრო ცენტრების”, - აცხადებს ზელენსკი.

მისი თქმით, მნიშვნელოვანია რუსეთზე სანქციების მეშვეობით განხორციელებული სამართლიანი ზეწოლა.

“უკრაინა მადლიერია ყველასი, ვინც მოქმედებს და პრინციპულ ზეწოლას ახორციელებს. ჩვენი პარტნიორების აბსოლუტური უმრავლესობა თანხმდება, რომ სანამ ეს დარტყმები და ეს ტერორისტული ომი გრძელდება, სისუსტის გამოჩენის დრო არ არის. მნიშვნელოვანია, რომ სანქციებმა რუსეთს - მათ შორის მის ოლიგარქებს - მკაფიო სიგნალი გაუგზავნოს: ომი უნდა დასრულდეს”, - აღნიშნა ზელენსკიმ.