ევროპული საბჭოს პრეზიდენტი, ანტონიო კოშტა, გაეროს გენერალური ასამბლეის ფარგლებში ირანის პრეზიდენტ მასუდ პეზეშკიანს შეხვდა და ირანს მოუწოდა, მეზობელი ქვეყნების წინააღმდეგ თავდასხმები შეწყვიტოს, - ინფორმაციას CNN-ი ავრცელებს.

კოშტამ განაცხადა, რომ მასსა და ირანის პრეზიდენტს შორის „გულახდილი და არსებითი საუბარი“ შედგა და ირანს მოუწოდა, აღადგინოს ნავიგაციის თავისუფლება ჰორმუზის სრუტეში, რაც ირანთან ომში ერთ-ერთ მთავარ სადავო საკითხს წარმოადგენს.

„ხაზგასმით აღვნიშნე, რომ დიალოგი კონფლიქტების მოგვარებისა და რეგიონში ხანგრძლივი მშვიდობის უზრუნველყოფის ერთადერთი გზაა“, - დაწერა კოშტამ სოციალურ ქსელ X-ში.

ევროპული საბჭოს პრეზიდენტმა ასევე მოუწოდა ირანს, განაახლოს თანამშრომლობა გაეროს ბირთვულ ზედამხედველ ორგანოსთან - ატომური ენერგიის საერთაშორისო სააგენტოსთან (IAEA). ირანმა განაცხადა, რომ არ შეასრულებს სააგენტოს მოთხოვნას დაბომბილი ბირთვული ობიექტების ინსპექტირების შესახებ; ამის მიზეზად კი სამხედრო დარტყმების შედეგად დაზიანებული ობიექტების შემოწმების დადგენილი რეგულაციების არარსებობა დაასახელა.

ცნობისთვის, ივნისში ისრაელმა და შეერთებულმა შტატებმა ირანის ბირთვული პროგრამის წინააღმდეგ მასშტაბური სამხედრო დარტყმები განახორციელეს, რის შედეგადაც დაზიანდა ისეთი მნიშვნელოვანი ობიექტები, როგორიცაა ნათანზი, ფორდოუ და ისფაჰანი.