უკრაინის პრეზიდენტი, ვოლოდიმირ ზელენსკი ბრიუსელში ჩავიდა, - ამის შესახებ ინფორმაციას თავად ზელენსკი სოციალურ ქსელში ავრცელებს.

„ჩემს გუნდთან ერთად უკვე ბრიუსელში ვარ, რათა მონაწილეობა მივიღო ევროპული საბჭოს სხდომაში და მოლაპარაკებები გავმართო ჩვენს პარტნიორებთან”, - წერს ზელენსკი.

მისივე თქმით, დღეს დაგეგმილია მნიშვნელოვანი შეხვედრები ნატო-ს გენერალურ მდივანთან, საფრანგეთის პრეზიდენტთან, ასევე პოლონეთის, დანიისა და ბელგიის პრემიერ-მინისტრებთან, ასევე, ბელგიის მეფე ფილიპესთან. ხვალ კი დაგეგმილია შეხვედრები ევროპული საბჭოსა და ევროკომისიის პრეზიდენტებთან, ისევე როგორც უნგრეთის, ფინეთისა და შვედეთის პრემიერ-მინისტრებთან.

„ევროპაში ყველას გვსურს, რომ ეს ომი დასრულდეს. ამისთვის კი საჭიროა მკაფიო სიგნალები - რუსეთზე უფრო ქმედითი ზეწოლა და უკრაინისთვის თავდაცვის სფეროში მხარდაჭერის გაძლიერება. ახლა განსაკუთრებით მნიშვნელოვანია ერთობლივი მოქმედება ადამიანთა სიცოცხლის დასაცავად“, - აცხადებს ზელენსკი.